Mumbai News : जसप्रीत बुमरा (५/२१) याने भेदक गोलंदाजी केल्यानंतर इशान किशन (६९ धावा) व सूर्यकुमार यादव (५२ धावा) यांनी झळकावलेल्या आक्रमक अर्धशतकांच्या जोरावर मुंबई इंडियन्सने गुरुवारी रॉयल चॅलेंजर्स बंगळूरचा सात विकेट व २७ चेंडू राखून धुव्वा उडवला. मुंबईने सलग दुसऱ्या विजयाला गवसणी घातली. बंगळूरचा हा पाचवा पराभव ठरला.

बंगळूरकडून मुंबईसमोर १९७ धावांचे आव्हान ठेवण्यात आले. इशान किशन व रोहित शर्मा या सलामी जोडीने नवव्या षटकात १०१ धावा फटकावत इरादे स्पष्ट केले. इशानच्या झंझावातात बंगळूरच्या गोलंदाजांचा पालापाचोळा झाला. त्याने ३४ चेंडूंमध्ये सात चौकार व पाच षटकारांसह ६९ धावांची खेळी केली. आकाशदीपच्या गोलंदाजीवर तो बाद झाला.

दरम्यान, याआधी मुंबईने नाणेफेक जिंकून प्रथम क्षेत्ररक्षण करण्याचा निर्णय घेतला. विराट कोहलीच्या फलंदाजीवर सर्वांच्या नजरा खिळल्या होत्या; पण जसप्रीत बुमराच्या गोलंदाजीवर तो तीन धावांवरच इशान किशनकरवी झेलबाद झाला.

आकाश मधवालने विल जॅक्सला आठ धावांवर बाद करीत बंगळूरला दुसरा धक्का दिला. यानंतर मात्र फाफ ड्युप्लेसी व रजत पाटीदार या जोडीने ८२ धावांची भागीदारी करताना मुंबईच्या गोलंदाजांचे आव्हान परतवून लावण्याचा प्रयत्न केला. जेराल्ड कोएत्झी याने पाटीदारला किशनकरवी झेलबाद केले. या लढतीत पाटीदारने २६ चेंडूंमध्ये तीन चौकार व चार षटकारांसह ५० धावांची खेळी केली. अखेर तो फॉर्ममध्ये आला.

फिरकी गोलंदाज श्रेयस गोपालने ग्लेन मॅक्सवेलला शून्यावर पायचीत बाद करीत मोठा अडसर दूर केला; पण ड्युप्लेसी व दिनेश कार्तिक यांनी बंगळूरचा डाव सावरला. दोघांनी अप्रतिम फलंदाजी केली. ड्युप्लेसीने ४० चेंडूंमध्ये ६१ धावांची खेळी केली. यामध्ये चार चौकार व तीन षटकारांचा समावेश होता. बुमराने त्याला बाद केले.

कार्तिक व बुमरा चमकले

बंगळूर फलंदाजी करीत असताना अखेरच्या षटकांमध्ये दिनेश कार्तिक व जसप्रीत बुमरा चमकले. कार्तिकने २३ चेंडूंमध्ये नाबाद ५३ धावांची खेळी साकारताना पाच चौकार व चार षटकारांची आतषबाजी केली. याचदरम्यान बुमराने महिपाल लोमरोर, सौरव चौहान व विजयकुमार वैशाखला बाद करीत ठसा उमटवला. बंगळूरने १९६ धावांपर्यंत मजल मारली.

सूर्याचा झंझावात

इशान बाद झाल्यानंतर इम्पॅक्ट खेळाडू सूर्यकुमार यादव खेळपट्टीवर आला. त्याने अवघ्या १९ चेंडूंमध्ये पाच चौकार व चार षटकारांसह ५२ धावांची धडाकेबाज खेळी केली. विल जॅक्सच्या गोलंदाजीवर रोहित ३८ धावांवर बाद झाला. विजयकुमार वैशाखने सूर्यकुमारला बाद केले. हार्दिक पंड्या (नाबाद २१ धावा) व तिलक वर्मा (नाबाद १६ धावा) यांनी मुंबईच्या विजयावर शिक्कामोर्तब केले.

संक्षिप्त धावफलक : रॉयल चॅलेंजर्स बंगळूर - २० षटकांत ८ बाद १९६ धावा (फाफ ड्युप्लेसी ६१, रजत पाटीदार ५०, दिनेश कार्तिक नाबाद ५३, जसप्रीत बुमरा ५/२१) पराभूत वि. मुंबई इंडियन्स १५.३ षटकांत ३ बाद १९९ धावा (इशान किशन ६९, सूर्यकुमार यादव ५२).