Hyderabad latest weather forecast : आयपीएल 2024 मध्ये आज सनरायझर्स हैदराबाद आणि लखनऊ सुपर जायंट्स यांच्यात सामना होणार आहे. हा सामना हैदराबादच्या राजीव गांधी आंतरराष्ट्रीय स्टेडियमवर खेळला जाणार आहे.

मात्र, या सामन्यावर पावसाची छाया पसरली. पावसामुळे संपूर्ण सामना रद्द करावा लागला तर चेन्नई सुपर किंग्जला नुकसान सहन करावे लागू शकते. तर आरसीबी आणि दिल्ली कॅपिटल्सला त्याचा फायदा होऊ शकतो.

SRH विरुद्ध LSG सामन्यावर पावसाचे सावट

हैदराबादमध्ये काल रात्री मुसळधार पाऊस झाला आणि आज संध्याकाळी सहाच्या सुमारास पावसाची शक्यता आहे. सामन्याच्या आधी पाऊस पडण्याची सुमारे 32% शक्यता आहे आणि जर परिस्थिती बिघडली तर सामना रद्द केला जाऊ शकतो.

सनरायझर्स हैदराबाद आणि लखनौ सुपर जायंट्स यांच्यातील सामना पावसामुळे रद्द झाल्यास दोन्ही संघांना प्रत्येकी एक गुण मिळेल. अशा स्थितीत सनरायझर्स आणि लखनौचे प्रत्येकी 13 गुण होतील. याचा सर्वाधिक फायदा लखनौ सुपर जायंट्सला होणार असून ते टॉप-4 मध्ये येतील. तर सनरायझर्स हैदराबाद देखील टॉप 4 मध्ये आपले स्थान मजबूत करेल.

याशिवाय दिल्ली कॅपिटल्सलाही मोठा फायदा होऊ शकतो. त्यांचे सध्या 12 गुण आहेत आणि जर त्यांनी पुढील सामना जिंकला तर दिल्लीचे 14 गुण होतील. आणि अशा स्थितीत ते या दोन्ही संघांच्या पुढे जाऊन टॉप-4 मध्ये आपले स्थान पक्के करतील. या पावसाचा फायदा आरसीबीलाही होणार आहे.

हा सामना रद्द झाल्यास चेन्नई सुपर किंग्जचे सर्वात मोठे नुकसान होऊ शकते. त्यांचे सध्या 12 गुण आहेत आणि ते तिसऱ्या स्थानावर आहेत. सामना रद्द होताच, लखनौ आणि हैदराबाद दोघांचे प्रत्येकी 13 गुण होतील आणि CSK पुन्हा टॉप-4 मधून बाहेर पडेल. मात्र, चेन्नई सुपर किंग्ज त्यांचा पुढचा सामना जिंकून टॉप-4 मध्ये परत येऊ शकतो.