Mumbai Indians: इंडियन प्रीमयर लीग 2024 स्पर्धेत पाचवेळचा विजेता मुंबई इंडियन्स संघाची कामगिरी फारशी चांगली झालेली नाही. त्यांना आत्तापर्यंत खेळला गेलेल्या 9 सामन्यांपैकी 3 सामन्यांतच विजय मिळवता आलेली आहे.

मुंबईच्या या खराब कामगिरीमागे संघात दुफळी निर्माण झाल्याची शंका ऑस्ट्रेलियाचा विश्वविजेता कर्णधार मायकल क्लार्कने व्यक्त केली आहे.

आयपीएल 2024 स्पर्धा सुरु होण्यापूर्वीच मुंबईने नेतृत्वबदल केला होता. त्यांना 5 वेळचा आयपीएल विजेता कर्णधार रोहित शर्माला हटवत त्याच्या जागेवर हार्दिक पांड्याकडे नेतृत्वाची धुरा सोपवली. त्यामुळे मुंबई इंडियन्सवर मोठ्या प्रमाणात टीकाही झाली आहे.

आता हा अचानक झालेल्या बदलालाने मुंबई संघात अनेक गोष्टी बदलल्याचे मत क्लार्कने व्यक्त केले आहे.

स्टार स्पोर्ट्स क्रिकेट लाईव्हमध्ये बोलताना क्लार्क म्हणाला, 'मला माहित नाही, ते प्लेऑफमध्ये पोहचतील की नाही. जे बाहेरून दिसत आहे, त्यापेक्षाही जास्त काहीतरी आत चालू आहे. तुमच्याकडे इतके चांगले खेळाडू असूनही तुमची कामगिरी इतकी अस्थिर असू शकत नाही.'

'त्यामुळे मला वाटके मुंबईच्या ड्रेसिंग रुममध्ये वेगवेगळे ग्रुप झाले आहेत आणि हे असे काहीतरी आहे जे काम करत नाहीये. ते एकत्र मिसळत नाहीयेत. एक संघ म्हणून खेळत नाहीयेत.'

याशिवाय क्लार्क असंही म्हणाला की एखाद्या खेळाडूचा चांगला वैयक्तिक खेळही त्यांना विजय मिळवून देऊ शकतो. तो म्हणाला, 'जर रोहित शर्माने येऊन आणखी एखादे शतक केले किंवा हार्दिकने चांगली खेळी केली किंवा बुमराह पुन्हा शानदार गोलंदाजी करत असेल, तर काहीही होऊ शकते.'

दरम्यान, सध्या मुंबई इंडियन्स गुणतालिकेत ९ व्या क्रमांकावर आहेत. अद्याप त्यांचे ५ सामने बाकी आहेत. त्यामुळे जर त्यांना आव्हान कायम ठेवायचे असेल, तर उर्वरित पाचही सामने जिंकावे लागणार आहेत.