MS Dhoni Injury Update: चेन्नई सुपर किंग्ज आयपीएल 2024 च्या प्लेऑफच्या शर्यतीतून बाहेर गेला आहे. ही तिसरी वेळ आहे जेव्हा सीएसके संघ प्लेऑफमध्ये पोहोचू शकला नाही. या पराभवानंतर 42 वर्षीय महेंद्रसिंग धोनीच्या निवृत्तीबाबत चर्चा सुरू झाली आहे. एमएस धोनीचा हा आयपीएलमधील शेवटचा सीझन होता, असे मानले जाते. पण या सगळ्या दरम्यान चेन्नई संघाचा माजी कर्णधार महेंद्रसिंग धोनीबद्दल एक मोठी बातमी समोर येत आहे.

एमएस धोनी आयपीएल 2024 दरम्यान दुखापतीशी झुंजताना दिसला होता. मात्र असे असतानाही तो सर्व सामने खेळला. धोनी या हंगामात स्नायूच्या दुखापतीने त्रस्त होता. अशा परिस्थितीत धोनी पुढच्या हंगामात खेळणार की नाही याबाबत ताज्या घडामोडींची माहिती असलेल्या एका सूत्राने महत्त्वाची माहिती दिली आहे.

या सूत्राने आयएएनएसला सांगितले की धोनी लंडनला जाऊ शकतो, जिथे त्याच्या स्नायूंच्या दुखापतीच्या उपचारासाठी त्याच्यावर शस्त्रक्रिया झाली होती. लंडनमध्ये उपचार घेतल्यानंतरच धोनी निवृत्तीचा निर्णय घेईल.

चेन्नईने लीग स्टेजमधील शेवटचा सामना आरसीबीविरुद्ध खेळला. हा सामना दोन्ही संघांसाठी करा किंवा मरो असा होता. ज्यामध्ये चेन्नईला पराभवाचा सामना करावा लागला. या सामन्यात प्रथम फलंदाजी करताना आरसीबी संघाने 20 षटकात 218 धावा केल्या. 219 धावांच्या लक्ष्याचा पाठलाग करताना चेन्नई सुपर किंग्जचा संघ 20 षटकात केवळ 191 धावाच करू शकला आणि या सामन्यात त्यांना 27 धावांनी पराभवाला सामोरे जावे लागले.