Gautam Gambhir : इंडियन प्रीमयर लीग 2024 स्पर्धेचे विजेतेपद कोलकाता नाईट रायडर्सने जिंकले. रविवारी चेन्नईत झालेल्या अंतिम सामन्यात श्रेयस अय्यरच्या नेतृत्वातील कोलकाताने सनरायझर्स हैदराबादला 8 विकेट्सने पराभूत करत विजेतेपदाला गवसणी घातली.

कोलकाताचे हे आयपीएलचे तिसरे विजेतेपद ठरले. यापूर्वी कोलकाताने २०१२ आणि २०१४ साली गौतम गंभीरच्या नेतृत्वाखाली आयपीएल विजेतेपदाला गवसणी घातली होती. विशेष म्हणजे कोलकाताने तिसऱ्यांदा आयपीएल ट्रॉफी गंभीरच्या मार्गदर्शनाखाली जिंकली. गंभीर या संघाचा आयपीएल 2024 साठी मेंटॉर होता.

दरम्यान, कोलकाताने रविवारी विजेतेपदाला गवसणी घातल्यानंतर नितीश राणाने गंभीरच्या एका मेसेजबाबत खुलासा केला आहे, जो मेसेज जवळपास 6 महिन्यांपूर्वीचा आहे.

कोलकाताचा स्टार क्रिकेटपटू नितीशने गंभीरचे कौतुक करताना म्हटले होते की 'मी एक छोटी गोष्ट सांगतो, जेव्हा गौतम भैय्याला मेंटॉर बनवले होते, तेव्हा मी त्याला एक लांबलचक मेसेज केला होता, कारण मी खूप खूश होतो.'

'त्यावर त्याने माझे आभार मानताना म्हटले होते की मला जर आपण ट्रॉफी घेऊन पोडियमवर उभे असू, तर मला आनंद होईल.' आज तो दिवस आहे, ज्यावेळी मी तो मेसेज कधीच विसरणार नाही.'

त्यानंतर आता मंगळवारी (28 मे) नितीशने गंभीरच्या त्या मेसेजचा स्क्रिनशॉटही शेअर केला आहे. त्यात तो मेसेज 22 नोव्हेंबर 2023 रोजी केल्याचे दिसत आहे.

तसेच त्यात दिसते की गंभीरने लिहिले आहे की 'मेसेजसाठी धन्यवाद नितीश. आता काहीतरी स्पेशल करू. ट्रॉफी जिंकून पोडियवर उभे राहण्याशिवाय दुसरा आनंद खेळात नसतो. आपण आता त्याचा अनुभव घेऊ.'

तसेच नितीशने कॅप्शनमध्ये लिहिले की 'माम्बा मानसिकतेच्या या काळात लवकरच आपण जीजी (गौतम गंभीर) मानसिकतेलाही स्विकारू.'

गंभीर याआधी दोनवर्षे लखनौ सुपर जायंट्स संघाचा मेंटॉर होता. त्याच्या मार्गदर्शनाखाली लखनौने गेल्या दोनवर्षात प्लेऑफमध्येही स्थान मिळवले होते. त्यानंतर त्याने आयपीएल २०२४ आधी कोलकाताचा मेंटॉर म्हणून जबाबदारी सांभाळली.