Piyush Chawla Record: इंडियन प्रीमियर लीग 2024 स्पर्धेचा 55 वा सामना सोमवारी (6 मे) मुंबई इंडियन्स विरुद्ध सनरायझर्स हैदराबाद संघात पार पडला.वानखेडे स्टेडियमवर झालेल्या या सामन्यात मुंबई इंडियन्सने 7 विकेट्सने विजय मिळवला.

मुंबईच्या विजयात मोलाचे योगदान देणाऱ्या खेळाडूंमध्ये पीयूष चावलाही आहे. चावलाने या सामन्यात मोठा विक्रमही केला आहे.

चावलाने या सामन्यात 4 षटके गोलंदाजी करताना 33 धावा खर्च करत 3 विकेट्स घेतल्या. त्याने ट्रेविस हेड, हेन्रिक क्लासेन आणि अब्दुल सामदला बाद केले.

या सामन्यात मुंबईने नाणेफेक जिंकून प्रथम गोलंदाजी करण्याचा निर्णय घेतला होता. त्यामुळे सनरायझर्स हैदराबाद संघ प्रथम फलंदाजीसाठी उतरला. हैदराबादकडून ट्रेविस हेडने चांगली सुरुवात केली होती.

पण जसप्रीत बुमराह आणि अंशुल कंभोजने अभिषेक शर्मा आणि मयंक आग्रवालला बाद केल्यानंतर मात्र मधल्या षटकांमध्ये चावलाने आपली फिरकीची जादू दाखवली.

त्याने आधी आक्रमक खेळणाऱ्या हेडला तिलक वर्माच्या हातून 48 धावांवर झेलबाद केले. त्यानंतर 13 व्या षटकात धोकादायक क्लासेनचा 2 धावांवरच त्रिफळा उडवला. 17 व्या षटकात त्याने सामदला 3 धावांवर पायचीत केले.

चावलाच्या या तीन विकेट्समुळे तो आता आयपीएलमध्ये सर्वाधिक विकेट्स घेणाऱ्या गोलंदाजांच्या यादीत ड्वेन ब्रावोला मागे टाकत पुढे गेला आहे.

त्याने गेल्याच सामन्यात ब्रावोला मागे टाकले होते, पण आता या तीन विकेट्समुळे त्याने ही आघाडी आणखी वाढवली आहे. तो या विक्रमाच्या यादीत दुसऱ्या क्रमांकावर आला आहे. चावलाच्या आता 190 सामन्यांत 187 विकेट्स झाल्या आहेत.

आयपीएलमध्ये सर्वाधिक विकेट्स घेणारे गोलंदाज (6 मे 2024 पर्यंत)

• 200* विकेट्स - युजवेंद्र चहल (155 सामने)

• 187 विकेट्स - पीयुष चावला (190 सामने)

• 183 विकेट्स - ड्वेन ब्रावो (161 सामने)

• 179 विकेट्स - भुवनेश्वर कुमार (171 सामने)

• 177 विकेट्स - सुनील नारायण (173 सामने)

• 174 विकेट्स - अमित मिश्रा (162 सामने)

मुंबईच विजय

दरम्यान, चावलाने घेतलेल्या या विकेट्सनंतर हैदराबादच्या फलंदाजीला खिंडार पडले. त्याला हार्दिक पांड्याच्या गोलंदाजीचीही चांगली साथ मिळाली. हार्दिकनेही 3 विकेट्स घेतल्या. त्यामुळे हैदराबादला 20 षटकात 8 बाद 173 धावा करता आल्या.

त्यानंतर सूर्यकुमार यादवने केलेल्या नाबाद 102 धावांच्या शतकी खेळीमुळे मुंबईने 17.2 षटकातच 174 धावांचे लक्ष्य पूर्ण केले.