मुंबई : मुंबई इंडियन्सचा कर्णधार हार्दिक पंड्याच्या नेतृत्वावर पुन्हा एकदा अनेकांनी टीका केली आहे. दडपणाखाली तो गोंधळून जातो, तसेच तो हतबलही होतो, असे मत ऑस्ट्रेलियाचा आणि दक्षिण आफ्रिकेचे माजी कर्णधार ॲरॉन फिन्च तसेच ग्रॅहम स्मिथ यांनी व्यक्त केले.

वानखेडे स्टेडियमवर कोलकता संघाविरुद्ध सामना जिंकण्याची संधी असताना मुंबई संघाला २४ धावांनी पराभवाचा सामना करावा लागल्यानंतर हार्दिकच्या नेतृत्वावरच प्रश्नचिन्ह उभे करण्यात आले. या सामन्यात कोलकता संघाची पहिल्या सहा षटकांत पाच बाद ५७ अशी अवस्था केल्यानंतरही मुंबईला सामन्यावर पकड मिळवता आली नाही.

पंड्याने यंदाच्या स्पर्धेच प्रथमच चार षटके गोलंदाजी दिली आणि दोन विकेटही मिळवल्या; परंतु फलंदाजीत संघाला गरज असताना तो केवळ एकाच धावेवर बाद झाला. मैदानावर नेतृत्व करताना किंवा गोलंदाजीत बदल, तसेच क्षेत्ररक्षण रचना करतानाही हार्दिक हतबल झालेला दिसतो. त्याच्यावर दडपण असल्याचे स्पष्ट दिसून येतो. जेव्हा आपल्याविरोधात अशा गोष्टी घडत असतात तेव्हा अशी परिस्थिती येते, हे ऑस्ट्रेलियाचे नेतृत्व करत असताना मीसुद्धा अनुभवले आहे, असे फिन्चने सांगितले.

हार्दिकच्या नेतृत्वाखाली खेळताना पूर्ण मुंबई इंडियन्सचा संघच गोंधळलेल्या स्थितीत असल्याचे जाणवत आहे. तो स्वतः दडपणाखाली अडखळत आहे. त्याचा परिणाम त्याच्या खेळावर होत आहे, असे स्मिथने सांगितले. ऑस्ट्रेलियाचा माजी सलामीवीर शेन वॉटसन यानेही हार्दिकच्या नेतृत्वावर प्रश्नचिन्ह उभे केले आहे. पाच बाद ५७ अशा स्थितीत आलेल्या कोलकता संघाला पुनरागमन करण्याची संधी हार्दिकने त्याच्या कल्पनाशून्य नेतृत्वामुळे मिळाली, असे वॉटसन म्हणाला.

निम्मा संघ एवढ्या स्वस्तात गमावल्यावर पर्यायी गोलंदाज असलेल्या नमम धीर याला गोलंदाजीसाठी कायम ठेवणे हीच मोठी चूक हार्दिकने केली. या काळात हुकमी गोलंदाज जसप्रीत बुमराला केवळ एकच षटक गोलंदाजी देण्यात आली, असे वॉटसनने सांगितले.