Jasprit Bumrah Mumbai Indian IPL 2024 : आयपीएल 2024 लिलावापूर्वी रिटेंशन यादी जाहीर करण्याच्या शेवटच्या दिवशी मुंबई इंडियन्स, हार्दिक पांड्या आणि गुजरात टायटन्स यांच्यामध्ये सुपर ड्रामा झाला होता. त्यानंतर हार्दिक मुंबईत परतला मात्र जसप्रीत बुमराहने त्याचवेळी एक क्रिप्टिक पोस्ट केली होती. जसप्रीत बुमराह मुंबई इंडियन्सवर नाराज असल्याची चर्चा सुरू झाली. आता मुंबई इंडियन्सनेच एक क्रिप्टिक ट्विट केले आहे.

मुंबई इंडियन्सने जसप्रीत बुमराहचा फोटो शेअर करत त्यावर कधी कधी शांत राहणं हेच सर्वोत्तम उत्तर असतं असा मजकूर लिहिला आहे. हाच मजकूर जसप्रीत बुमराहने देखील आठवड्यापूर्वी केलेल्या पोस्टमध्ये देखील वापरला होता. त्यावेळी चाहत्यांनी बुमराह हा मुंबई इंडियन्स सोडून चेन्नई सुपर किंग्जमध्ये दाखल होणार असल्याची चर्चा सुरू केली होती.

मुंबईचं नेतृत्व कोणाकडे?

मुंबई इंडियन्सचा रोहित शर्मा हा सर्वात यशस्वी कर्णधार आहे. त्याने पाचवेळा मुंबईला विजेतेपद मिळवून दिलं आहे. मात्र त्याची कारकिर्दी आता उतरणीला लागली आहे. रोहित शर्मा जरी आयपीएल 2024 मध्ये मुंबई इंडियन्सचे नेतृत्व करणार असला तरी त्याच्यानंतर मुंबईचे नेतृत्व कोण करणार हा प्रश्न उरतोच.

हार्दिक पांड्या मुंबई इंडियन्समध्ये परतला आहे. मात्र जसप्रीत बुमराहही गेल्या अनेक वर्षापासून मुंबई इंडियन्सकडून खेळतोय. अनेकांना वाटतंय की बुमराह हा रोहितनंतर मुंबईचा कर्णधार होईल.

मात्र पांड्याच्या नाट्यमरित्या मुंबई इंडियन्समध्ये परतण्याने कॅप्टन्सीबाबत अजूनच गोंधळ निर्माण झाला आहे. त्याने आपले नेतृत्व गुण हे गेल्या दोन हंगामापासून आणि भारतीय टी 20 संघाचे नेतृत्व करून सिद्ध केलं आहे.