Jasprit Bumrah India vs England 4th Test : भारत आणि इंग्लंड यांच्यातील 5 सामन्यांच्या कसोटी मालिकेतील तिसरा सामना 15 फेब्रुवारीपासून राजकोटमध्ये खेळला जाणार आहे. दोन्ही संघांसाठी हा सामना अत्यंत महत्त्वाचा असणार आहे. ही मालिका सध्या 1-1 अशी बरोबरीत आहे.

यादरम्यान अनुभवी वेगवान गोलंदाज जसप्रीत बुमराहला चौथ्या सामन्यातून विश्रांती दिली जाऊ शकते. याचे मोठे कारण समोर आले आहे. धर्मशाला येथे होणाऱ्या शेवटच्या कसोटी सामन्यासाठी बुमराह पूर्णपणे तंदुरुस्त असावा, अशी संघ व्यवस्थापनाची इच्छा आहे आणि त्यामुळेच त्याला चौथ्या कसोटी सामन्यातून विश्रांती देण्यात येईल.

विशाखापट्टणम कसोटी सामन्यात भारताच्या विजयात जसप्रीत बुमराहचे योगदान महत्त्वाचे होते. त्याने पहिल्या डावात 45 धावांत 6 विकेट्स घेतल्या होत्या, तर दुसऱ्या डावातही त्याने 46 धावांत 3 बळी मिळवले होते.

अशाप्रकारे, त्याने दोन्ही डावांत मिळून 9 विकेट घेतल्या, ही कोणत्याही कसोटी सामन्यातील त्याची दुसरी सर्वोत्तम कामगिरी आहे. या सामन्यात बुमराहने 150 कसोटी बळींचा आकडाही गाठला.

यानंतर बातम्या आल्या की बुमराहला तिसऱ्या कसोटी सामन्यातून विश्रांती दिली जाऊ शकते पण तसे झाले नाही. आता बातम्या येत आहेत की, अनुभवी वेगवान गोलंदाजाला तिसऱ्या सामन्याऐवजी चौथ्या सामन्यातून विश्रांती देण्यात येणार आहे.

टाईम्स ऑफ इंडियाच्या वृत्तानुसार एका सूत्राने सांगितले की, जसप्रीत बुमराहला रांची येथे होणाऱ्या चौथ्या कसोटी सामन्यातून विश्रांती दिली जाऊ शकते. यासह धर्मशाला येथे होणाऱ्या पाचव्या आणि शेवटच्या कसोटी सामन्यासाठी तो पूर्णपणे फ्रेश राहील. तो सामना या मालिकेतील निर्णायक सामनाही ठरू शकतो. मग बुमराहची उपस्थिती संघासाठी खूप महत्त्वाची ठरू शकते.