आयपीएलच्या 15 व्या हंगामात मुंबई इंडियन्सची (Mumbai Indians) सुरुवात खराब झाली आहे. कोरोनाच्या पार्श्वभूमीवर यंदाच्या हंगामातील ग्रुप स्टेजमधील सर्व लढती या महाराष्ट्रातील पुणे आणि मुंबईच्या मैदानात (Pune Mumbai Cricket Stadium) होत आहेत. मुंबईच्या ब्रेबॉर्न आणि डी. वाय. पाटील स्टेडियमवर रंगलेल्या सामन्यातील सलग दोन पराभवानंतर आता मुंबई इंडियन्सचा संघ पुण्याच्या मैदानात आपला पहिला सामना खेळणार आहे. या सामन्यात पहिल्या विजय मिळवण्याच्या इराद्याने ते मैदानात उतरतील. सुर्यकुमार यादव (Suryakumar Yadav) या सामन्यातून यंदाच्या हंगामाला सुरुवात करण्याची अपेक्षा आहे.

कोलकाता नाईट रायडर्स विरुद्धच्या लढतीतून सुर्यकुमार यादव मुंबई संघात परतणार आहे. त्याच्या येण्यामुळे संघाचा संघर्ष संपेल, अशी आशा मुंबई इंडियन्सच्या चाहत्यांना असेल. वेस्ट इंडीज विरुद्धच्या मालिकेत सुर्यकुमार यादवला दुखापत झाली होती. त्यामुळे पहिल्या दोन सामन्यात तो मुंबई इंडियन्स संघाचा भाग नव्हता. तो संघाचा हुकमी एक्का असून तो फिट असणे ही मुंबई इंडियन्सची जमेची बाजू ठरेल.

मुंबई पलटनच्या स्टार बॅटरने कोलकाता विरुद्धच्या सामन्याआधी आपल्या सोशल मीडियावरुन एक व्हिडिओ शेअर केलाय. यात तो फलंदाजीचा सराव करताना पाहायला मिळते. त्याचे हे फोटो तो कोलकाता विरुद्धच्या लढतीत मुंबई इंडियन्सच्या टीमच्या प्लेइंग इलेव्हनचा भाग असणार हे पक्के असल्याचे संकेत मिळतात.