रोहित शर्माच्या अनुपस्थितीत उप-कर्णधाराची धुरा खांद्यावर पडलेल्या लोकेश राहुलनं (KL Rahul) सेंच्युरीयनच्या (SuperSport Park, Centurion ) पहिल्या कसोटीत (South Africa vs India, 1st Test) शतकी धमाका केला. दक्षिण आफ्रिकेत शतकी खेळी करणारा भारताचा तो दुसरा सलामीवीर आहे. यापूर्वी वासीम जाफरने (Wasim Jaffer) अशी कामगिरी करुन दाखवली होती.

दक्षिण आफ्रिकेविरुद्धच्या कसोटी सामन्यात भारतीय संघाचा कर्णधार विराट कोहलीनं (Virat Kohli) टॉस जिंकून पहिल्यांदा गोलंदाजी करण्याचा निर्णय घेतला होता. रोहितच्या अनुपस्थितीत लोकेश राहुलनं मयांकच्या साथीने भारतीय संघाच्या डावाची सुरुवात केली. या जोडीनं पहिल्या विकेटसाठी शतकी भागीदारी रचली. मयांक अग्रवाल (Mayank Agarwal) 60 धावा करुन परतल्यानंतर त्याची जागा घेण्यासाठी आलेल्या पुजाराला (Cheteshwar Pujara) एनिग्डीनं (Lungi Ngidi) खातेही उघडू दिले नाही. कर्णधार विराट कोहली (Virat Kohli ) 35 धावांची भर घालून तंबूत परतला.

त्यानंतर दुसऱ्या बाजूनं लोकेश राहुलनं शतकाला गवसणी घातली. 41 व्या कसोटी सामन्यातील लोकेश राहुलचे हे 7 वे कसोटी शतक आहे. दक्षिण आफ्रिकेत त्याला चांगला स्टार्ट मिळाला आहे. दुसऱ्या दिवसाचा खेळ संपला त्यावेळी लोकेश राहुलसह अजिंक्य रहाणे लयीत खेळत होता. भारतीय राहुलच्या शतकाच्या जोरावर भारतीय संघाने पहिल्या दिवसाअखेर 3 बाद 272 धावा केल्या आहेत. लोकेश राहुल 122 धावांवर नाबाद खेळत होता. दुसऱ्या बाजूला अजिंक्य रहाणे 81 चेंडूत 40 धावांवर खेळत आहे.