बर्मिंगहॅम: भारताचा 20 वर्षाच्या लक्ष्य सेनने (Lakshya Sen) ऑल इंग्लंड बॅडमिंटन ओपनमध्ये धडाकेबाज कामगिरी करत फायनल गाठली होती. भारतीय खेळाडूने ऑल इंग्लंड ओपनमध्ये (All England Badminton Open) तब्बल 21 वर्षानंतर फायनल गाठली होती. त्यामुळे लक्ष्य सेन प्रकाश पदुकोन आणि पुलेला गोपिचंद यांचा कित्ता गिरवत प्रतिष्ठेची ऑल इंग्लंड ओपन जिंकेल अशी आस होती. मात्र जागतिक क्रमवारीत अव्वल स्थानावर असलेल्या व्हिक्टर अॅक्सेलसेनने (Viktor Axelsen) लक्ष्यला टार्गेटपासून दूर ठेवले. व्हिक्टरने लक्ष्यचा 21-10, 21-15 असा पराभव (Defeat) केला.

ऑलिम्पिक सुवर्णपदक विजेत्या व्हिक्टर अॅक्सेलसेन युवा लक्ष्य सेनचा 53 मिनिटात पराभव केला. पहिल्या गेममध्ये व्हिक्टरने सेनवर 6-0 अशी आघाडी घेतली होती. त्यानंतर व्हिक्टरने पहिला गेम 21-10 अशा मोठ्या फरकाने जिंकला. दुसऱ्या गेममध्ये लक्ष्यने प्रतिकार करण्याचा प्रयत्न केला मात्र अनुभवी व्हिक्टरने दुसरा गेम देखील 21-15 अशा फरकाने जिंकत लक्ष्य सेनचे 21 वर्षाचा दुष्काळ संपवण्याचे स्वप्न धुळीस मिळवले.

लक्ष्य सेन प्रतिष्ठेच्या ऑल इंग्लंड बॅडमिंटन ओपन स्पर्धेची फायनल खेळणारा प्रकाश नाथ (1974) प्रकाश पदुकोन (1980), पुलेला गोपिचंद (2001) आणि सायना नेहवाल (2015) यांच्यानंतरचा फक्त पाचवा बॅडमिंटनपटू होता. ऑल इंग्लंड बॅडमिंटन स्पर्धा ही सर्वात जुनी आणि प्रतिष्ठेची बॅडमिंटन स्पर्धा आहे.