मुंबई : महाराष्ट्राच्या मुलांनी बिहार मोतीहारी येथे सुरू असलेल्या ‘३३व्या किशोर गट राष्ट्रीय कबड्डी’ स्पर्धेची उपउपांत्य फेरी गाठली. उपउपांत्यपूर्व फेरीत महाराष्ट्राने हिमाचल प्रदेशचा ५२-३४ असा पराभव केला.

दोन्ही संघांनी सुरुवातीपासून आक्रमक खेळ करत गुण घेण्याचा सपाटा लावला. यात महाराष्ट्र पहिल्यापासून आघाडीवर होते. पहिल्या सत्राचा खेळ थांबला तेव्हा २८-१८ अशी आघाडी होती. दुसऱ्या सत्रात महाराष्ट्राने आपला खेळ गतिमान करीत गुणांचे अर्धशतक पार केले.

शेवटच्या काही मिनिटात महाराष्ट्र गुणांच्या शर्यतीत पुढे निघून गेले. धीरज सरोज यांच्या तुफानी चढाया, त्याला समीर शेखची मिळालेली पकडीची साथ यामुळे हा विजय शक्य झाला. उपउपांत्य फेरीत महाराष्ट्राची गाठ साई संघाशी पडेल.