रौप्यपदक थोडक्यात हुकले असले तरी देशासाठी ब्राँझपदक जिंकले याचा आनंद आणि अभिमान आहे. निर्णायक क्षणी भगवद्गीतेमधील सार माझ्या कामी आले, अशी भावना ब्राँझपदक विजेत्या मनू भाकर हिने व्यक्त केली.

पॅरिस ऑलिंपिकमध्ये १० मीटर एअर पिस्तुल प्रकारात मनू भाकर हिने ब्राँझपदक मिळवले. वास्तविक तिचे रौप्यपदक थोडक्यात हुकले. सुवर्ण आणि रौप्यपदके जिंकणाऱ्या कोरियन नेमबाजांविरुद्ध मनू लढत होती. अंतिम चार खेळाडूंच्या शर्यतीत मनू तिसऱ्या स्थानावर होती; पण यावेळी एकाग्रता राखून मनूने पहिल्या तिघांमध्ये स्थान कायम राखले.

अंतिम क्षणी माझ्यामध्ये जेवढी क्षमता आहे तेवढी मी पणास लावली होती. मी भगवद्गीता वाचते आणि त्याप्रमाणे मनाची शक्तीही वाढवते. जेवढे तुम्ही करू शकता ते काम करायचे. नशीब तुमच्या हाती नसते. गीतेमध्ये कृष्णाने अर्जुनाला सांगितलेय, तू तुझे कर्म करत राहा... पुढचा विचार करू नको. मीसुद्धा तेच केले. अंतिम क्षणी माझ्या मनातही तोच विचार होता. आपल्या ध्येयावर मी लक्ष केंद्रीत केले होते, असे मनूने सांगितले.

टोकियो ऑलिंपिकमध्ये झालेल्या प्रकारानंतर मी फार निराश झाले होते. त्यातून बाहेर पडण्यासाठी मला बराच वेळ द्यावा लागला होता; पण त्यानंतर मी अधिक कणखर होऊन परतले; परंतु जे झाले तो इतिहास होता.

पात्रता फेरीतून मी अंतिम फेरी निश्चित केली तेव्हापासून मला आजच्या दिवसाचे वेध लागले होते. हा दिवस आव्हानात्मक असणार, याची जाणीव होती. कारण येथे असलेले भारतीय आणि देशातून मला सपोर्ट करणारे सर्व भारतीयांचे मी आभारी आहे. हे पदक माझे नसून संपूर्ण देशवासीयांचे आहे.

या ऑलिपिक स्पर्धेत भारतीयांना अधिकाधिक पदके मिळवावी, असे मला मनापासून वाटते. मी या पदकांची सुरुवात केली याचा आनंद आहे. आता माझ्या मनात कोणत्या भावना दाटून येत आहेत त्या शब्दबद्ध करणे कठीण आहे. तसेच, उद्या, परवाही माझे सामने आहेत.

सर्वांचे आभार

कठीण काळात माझ्यासोबत राहिलेले आणि मला प्रोत्साहन देणारे माझे कुटुंब, माझे प्रशिक्षक यांचेच केवळ मी आभार मानणार नाही तर संपूर्ण देशवासीयांचीही मी आभारी आहे.