जीनेव्हा : जागतिक ॲथलेटिक्स संघटनेकडून काही दिवसांपूर्वीच पॅरिस ऑलिंपिकमधील ‘सुवर्ण’विजेत्यांवर धनवर्षाव करण्यात येणार असल्याची घोषणा करण्यात आली. आता आंतरराष्ट्रीय बॉक्सिंग संघटनेकडूनही (आयबीए) ऑलिंपिकमधील पदकविजेत्याला ५० हजार डॉलर बक्षिसाच्या रूपात देण्यात येतील, असे जाहीर करण्यात आले; मात्र आंतरराष्ट्रीय ऑलिंपिक समितीने (आयओसी) आयबीएशी संबंध तोडले आहेत. त्यांची मान्यता रद्द करण्यात आली आहे. त्यामुळे त्यांच्याकडून घेण्यात आलेला निर्णयही आयओसीकडून अमान्य करण्यात आला आहे.

आयबीएकडून पॅरिस ऑलिंपिकमध्ये सहभागी होत असलेले खेळाडू, प्रशिक्षक यांना आर्थिक स्वरूपात बक्षीस देण्यात येणार आहे. १३ विविध वजनी गटांमध्ये जगातील बॉक्सर पॅरिस ऑलिंपिकमध्ये सहभागी होणार आहेत. यासाठी पुरुष तसेच महिला खेळाडूंसह त्यांच्या प्रशिक्षकांसाठी २१ लाख डॉलरची बक्षिसे ठेवण्यात आली आहेत. उपांत्यपूर्व फेरीत पोहोचणाऱ्या खेळाडूंना प्रत्येकी १० हजार डॉलर देण्यात येणार आहेत.

दरम्यान, आयओसीकडून आयबीएच्या कारभारावर प्रश्‍नचिन्ह निर्माण करण्यात आले होते. २०१६मधील रिओ दी जेनेरियोच्या ऑलिंपिक लढतींच्या निकालांवरही संशय निर्माण झाला होता. त्यामुळे टोकियोनंतर आता पॅरिस ऑलिंपिकपासून आयबीएला दूर ठेवण्यात आले आहे. आयओसीच्या निर्णयावर आयबीएच्या पदाधिकाऱ्यांकडून टीकाही करण्यात आली आहे.

जागतिक ॲथलेटिक्सच्या निर्णयावरही नाराजी

जागतिक ॲथलेटिक्सकडून काही दिवसांपूर्वी ऑलिंपिकमधील सुवर्णपदक विजेत्यांवर धनवर्षाव करण्यात येणार असल्याची घोषणा करण्यात आली होती. त्यावर आंतरराष्ट्रीय ऑलिंपिक समितीने नाराजी व्यक्त केली होती. २०२८मध्ये लॉस एंजेलिसमध्ये ऑलिंपिकचे आयोजन करण्यात येणार आहे. २०२८मधील ऑलिंपिकमध्ये रौप्य व ब्राँझपदक जिंकणाऱ्या खेळाडूंनाही जागतिक ॲथलेटिक्सकडून धनवर्षाव करण्यात येणार आहे.

अरुंधती, अंकुशिताचे विजय

थायलंडमधील बँकॉक येथे बॉक्सिंग या खेळाची पॅरिस ऑलिंपिक पात्रता फेरी सुरू आहे. भारताच्या अरुंधती चौधरी हिने ६६ किलो वजनी गटात, तर अंकुशिता बोरो हिने ६० किलो वजनी गटात प्रतिस्पर्ध्यांना पराभूत करीत पुढे पाऊल टाकले. भारताच्या नरेंदर बेरवाल याला मात्र ९२पेक्षा जास्त किलो वजनी गटात पराभवाला सामोरे जावे लागले.