Commonwealth Games 2022 : भारताचा कुस्तीपटू नवीनने पाकिस्तानच्या मोहम्मद शाहीर ताहीरला पराभवत करत 74 किलो वजनी गटात सुवर्ण पदक मिळवले. याचबरोबर भारताने कुस्तीत 6 सुवर्ण पदक पटकावले. भारताने राष्ट्रकुल स्पर्धेत कुस्तीत पहिल्यांदाच 6 सुवर्ण पदक पटकावले. नवीनने 9 - 0 असा एकतर्फी विजय मिळवला.

भारतीय नेव्हीमध्ये कार्यरत असलेल्या नवीनने पाकिस्तानच्या ताहीरवर पहिल्या फेरीत पायावर आक्रमण करण्याचा प्रयत्न केला. मात्र ताहिरने आपला बचाव केला. दरम्यान, नवीन पाकिस्तानच्या ताहीरवर मजबूत पकड बनवली. त्याने पहिल्या फेरीत 2 गुण पटकावले.

त्यानंतर दुसऱ्या फेरीत तांत्रिक दोन गुण पटाकवले आणि त्यानंतर त्याने भारंदाज डाव टाकत 9 गुणांची कमाई केली. नवीन सामना संपेपर्यंत 9 - 0 असा आघाडीवर राहिला. पाकिस्तानच्या मोहम्मद ताहिरला फायनलमध्ये एकही गुण मिळवणे शक्य झाले नाही. नवीनने तांत्रिक सरसतेवर सामना जिंकला.

याचबरोबर, भारताची स्टार कुस्तीपटू विनेश फोगाटने (Vinesh Phogat) श्रीलंकेच्या चमोदियाचा 4 - 0 असे पराभूत करत सुवर्ण पदक पटकावले. विनेशने या सुवर्ण पदकासह राष्ट्रकुल स्पर्धेतील आपले सलग तिसरे सुवर्ण पदक (Gold Medal) पटकावले.

भारताचा कुस्तीपटू रवी कुमार दहियाने पुरूष 57 किलो वजनी फ्रीस्टाईल गटात सुवर्ण पदक पटकावले. त्याने नायजेरियाच्या एबिकेनेनिमो वेल्सनचा 10 - 0 असा पराभव केला. रवी कुमार दहियाची ही पहिलीच राष्ट्रकुल स्पर्धा होती त्याने पहिल्याच स्पर्धेत फायनल पर्यंत धडक मारली होती.

भारताच्या पूजा गेहलोतने स्कॉटलँडच्या ख्रिस्टलेचा 12 - 2 असा पराभव करत महिला 50 किलो फ्रीस्टाईलमध्ये कांस्य पदक पटकावले. कुस्तीमधून भारताला मिळालेले हे दुसरे कांस्य पदक आहे.