पंजाबचे माजी मंत्री, काँग्रेसचे माजी प्रदेशाध्यक्ष आणि माजी क्रिकेटपटू नवज्योतसिंग सिध्दू (Navjot Singh Sidhu) पटियाला तुरुंगात आहेत. 34 वर्षे जुन्या रोड रेज प्रकरणी नवज्योतसिंग सिध्दू यांच्यावर अटकेची कारवाई करण्यात आली होती.

मात्र, आता लवकरच नवज्योतसिंग सिध्दूची तरुंगातून सुटका होण्याची शक्यता वर्चवली जात आहे. सध्या सिध्दू पटियाला मध्यवर्ती कारागृहात (Patiala Central Jail) शिक्षा भोगत आहेत. मात्र, 6 महिन्यांपासून तुरुंगात शिक्षा भोगत असलेले नवज्योतसिंग सिध्दू आता वेळेपूर्वीच तुरुंगातून बाहेर येऊ शकतात. तुरुंगातील चांगल्या वर्तणुकीमुळं सरकार त्यांना जानेवारीत मुक्त करू शकतं.

अद्याप यावर अधिकृत शिक्कामोर्तब झालं नाही. मात्र, काही दिवसांपूर्वीच सिध्दूंना पतियाला तुरुंगात भेटायला गेलेल्या वरिष्ठ नेत्यांनी ही माहिती दिली आहे. मिळालेल्या माहितीनुसार, काही दिवसांपूर्वीच काही वरिष्ठ काँग्रेस नेते नवज्योत सिंग सिध्दूंना भेटायला तुरुंगात गेले होते. भेटीनंतर परतलेले एक ज्येष्ठ नेते म्हणाले, सिध्दूंची तुरुंगातील चांगली वर्तणूक पाहता येत्या 26 जानेवारी रोजी त्यांना मुक्त केलं जाऊ शकतं. गेल्या साडेसहा महिन्यांपासून ते पतियाला तुरुंगात आहेत. तिथं ते त्यांच्या कोठडीत क्लार्कचं कामही करत आहेत. तुरुंगात नियम असतानाही त्यांनी सुटीही घेतली नाही.