Neeraj Chopra Mother : भारताचा गोल्डन बॉय नीरज चोप्राने जागतिक अ‍ॅथलेटिक्स अजिंक्यपद स्पर्धेत भारताला पहिले वहिले सुवर्ण पदक जिंकून देत इतिहास रचला. यापूर्वी कोणत्याही भारतीय खेळाडूला या स्पर्धेत सुवर्ण पदकाची कमाई करता आली नव्हती.

नीरज चोप्रा हा जागतिक अ‍ॅथलेटिक्स अजिंक्यपद स्पर्धेत दोन पदकं जिंकणारा पहिला भारतीय खेळाडू देखील ठरला. भालाफेक स्पर्धेत नीरज चोप्राने 88.17 मीटर लांब भाला फेकून सुवर्ण पदक पटकावले. तर पाकिस्तानचा भालाफेकपटू अर्शद नदीमने 87.82 मीटर लांब भालाफेक करत रौप्य पदक पटकावले.

या स्पर्धेकडे भारत - पाकिस्तान सामना असं पाहिलं गेलं. पत्रकारांनी देखील याच संदर्भाने नीरजच्या आई सरोज देवींना प्रश्न विचारला. मात्र सरोज देवी यांनी याचं भन्नाट उत्तर दिलं.

सरोज देवी या पत्रकार परिषदेत म्हणाल्या की, 'हे पाहा सर्वजण मैदानावर खेळण्यासाठी जातात. एक नाही तर दुसरा जिंकणारच असतो. त्यामुळे पाकिस्तान किंवा हरियाणा हा प्रश्नच नाही. हा विषय आनंदाचा आहे. जरी पाकिस्तानी जिंकला असता तरी त्यांच्यासाठीही तो आनंदाचाच क्षण असता.'

नीरज चोप्राने एक वर्तुळ पूर्ण केलं आहे. त्याने ज्या स्पर्धा जिंकायला हव्या आहेत त्या सर्व जिंकल्या आहेत. त्याने ज्या आंतरराष्ट्रीय स्पर्धांमध्ये सहभाग घेतला तेथे नीरज आणि अर्शद हे एकमेकांसमोर उभे होतेच. दोघेही अव्वल स्थानासाठी एकमेकांना भिडले. मात्र बऱ्याचवेळा नीरजने अव्वल स्थान पटकावले आहे.

नीरजने सामन्यानंतर माध्यमांशी बोलताना सांगितले की, भालाफेकीत भारत आणि पाकिस्तानचे खेळाडू चांगली कामगिरी करत आहेत याचा आनंदच आहे. भालाफेकीत पारंपरिकरित्या युरोपियन देशांचं वर्चस्व राहिलं आहे.

नीरज चोप्रा म्हणाला होता, 'मला वाटतं की अर्शदीपने चांगल्या पद्धतीने भाला फेकला. भालाफेकीत दोन्ही देश कशी प्रगती करत आहेत याची चर्चा करत होतो. यापूर्वी युरोपियन खेळाडू सर्वोच्च स्थानावर होते. आता आम्ही सर्वोच्च स्थानावर आहे.'

(Sports Latest News)