कुपवाड (सांगली) - भाई नेरूरकर करंडक खो-खो स्पर्धेत किशोर-किशोरी गटात यजमान सांगलीने दुहेरी मुकुटाचा मान मिळवला; तर पुरुष आणि महिला या सिनियर गटात पुण्याचे दुहेरी यश साध्य केले.

महिला गटात पुण्याने धाराशिवला (११-१०) ४.१० मिनिटे राखून १ गुणाने मात केली. पुण्याकडून प्रियांका इंगळे (२.४०, २.१० मि. संरक्षण व ४ गुण), कोमल धारवाडकर (२, १ मि. संरक्षण), काजल भोर यांनी पुण्याच्या विजयात सिंहाचा वाटा उचलला.

पुरुष गटात अंतिम सामन्यात पुण्याने मुंबई उपनगरवर (२०-१०) अशी १० गुणांनी सहज मात केली. या विजयात पुण्याकडून खेळताना आदित्य गणपुले (२.३०, १.१० मि. संरक्षण व ५ गुण), शुभम थोरात (२.४० मि. संरक्षण), सुयश गरगटे (२, १ मि. संरक्षण व २ गुण) यांनी मोलाची कामगिरी केली. मुंबई उपनगरकडून अनिकेत चेंदणकर, ऋषिकेश मुरचावडे यांनी प्रतिकार केला.

किशोरींच्या अंतिम सामन्यात यजमान सांगलीने धाराशिवचा (२५-२२) ३ गुणांनी पराभव केला; तर किशोर गटात सांगलीने ठाण्याचा लघुत्तम आक्रमणापर्यंत रंगलेल्या सामन्यात मात केली. सांगलीकडून रितेश भालदार (१.३०,१.५० व १ मि. संरक्षण व ४ गुण), संग्राम डोबळे (२, १, ३ मि. संरक्षण) यांनी दमदार खेळ केला.