नवी दिल्ली : गुणवत्ता, क्षमता आणि जिद्द असली की खेळाडूंना वयाचे बंधन नसते. यंदाची पॅरिस ऑलिंपिकही त्यास अपवाद नसेल. कारण ११ वर्षीय मुलगी ते ६० वर्षीय वयस्क या ऑलिंपिक क्रीडा महोत्सवात स्पर्धा करणार आहेत.

११ वर्षे ११ महिने वय असलेली चीनची स्केटबोर्डर खेळाडू झेंग होहाओ या पॅरिस ऑलिंपिकमध्ये आपले पदार्पण करणार आहे. यंदाच्या स्पर्धेतील ती सर्वात लहान खेळाडू असणार आहे. आतापर्यंत सर्वात लहान खेळाडू ऑलिंपिकमध्ये खेळण्याचा विक्रम ग्रीक जिम्नॅस्ट दिमित्रिओस लाउंड्रास हिच्या नावावर होता.

१९८६ च्या स्पर्धेत तिचे वय १० वर्षे २१८ दिवस असे होते. झेंग ११ ऑगस्ट रोजी १२ वर्षांची होणार आहे. २०२१ मध्ये झालेल्या टोकियो ऑलिंपिकच्या वेळी होहाओ सात वर्षांची होती आणि हौसमधून ती स्केटबोर्डर खेळू लागली.

टोकियो ऑलिंपिकसाठी झालेल्या चाचणी स्पर्धेत मी वयाने मोठ्या असलेल्या खेळाडूंना खेळताना पाहिले होते आणि आपणही हा खेळ खेळावा असे मला वाटले, असे होहाओ म्हणाली. झेंग होहाओ हीच केवळ बालकवयीन खेळाडू या ऑलिंपिकमध्ये असणार असे नाही. कॅनेडियन स्केटबोर्डर फे डे फॅजिओ एबर्ट १४ वर्षीय, तर अमेरिकेच्या क्विन्सी विल्सन आणि हेझली रिवेरा, ग्रेट ब्रिटनची लोला टेम्बलिंग आणि स्काय ब्राउन या १६ वर्षीय खेळाडू असतील.

७२ वर्षांतही ऑलिंपिक

सर्वाधिक वयस्क खेळाडू होण्याचा मान स्वीडनचे नेमबाज ऑस्कर स्वाहन यांच्या नावावर आहे. १९२० मधील अँटवर्प ऑलिंपिकमध्ये ते ७२ वर्षांचे होते.

भारताकडून धिनिधी सर्वांत लहान

भारताकडून जलतरणपटू धिनिधी देसिंघू ही सर्वात लहान खेळाडू असणार आहे. ती १४ वर्षांची आहे. या ऑलिंपिकमध्ये ती २०० मीटर फ्रिस्टाईलमध्ये सहभागी होणार आहे. ऑलिंपिक कोट्यातून ती पात्र ठरली आहे.

जिल इरविंग सर्वात वयस्क

कॅनडाची अश्वारोहक जिल इरविंग ही या ऑलिंपिकमध्ये सहभागी होणारी सर्वात वयस्व खेळाडू असणार आहे. ६१ व्या वर्षी ती या पॅरिस ऑलिंपिकमध्ये पदार्पण करणार आहे. झेंग होहाओपेक्षा तिचे वय पाच पटीने अधिक आहे. मात्र ६९ वर्षीय ऑस्ट्रेलियाची मेरी हाना जिल इरविंग हिला मागे टाकू शकतात. १९९६ च्या ॲटलांटा स्पर्धेपासून ती अश्वरोहणात सहभागी होत आहेत. आताही त्यांचा संघात राखीव खेळाडू म्हणून समावेश आहे. ऑस्ट्रेलिया संघातील एखादा खेळाडू जखमी झाला किंवा आजारी पडला तरच मेरी हाना खेळू शकतात.