Pakistan ODI World Cup 2023 squad announced Naseem Shah : पाकिस्तान क्रिकेट बोर्डाने शुक्रवारी एकदिवसीय वर्ल्डकपसाठी संघाची घोषणा केली. आशिया कप स्पर्धेत खेळलेल्या दोन खेळाडूंना या संघातून वगळण्यात आले आहे. नसीम शाह दुखापतीमुळे बाहेर पडला आहे. त्याच्या जागी हसन अली संघात आला आहे.

वेगवान गोलंदाज फहीम अश्रफच्या जागी लेगस्पिनर उसामा मीरचा संघात समावेश करण्यात आला आहे. आशिया कपमध्ये भारताविरुद्ध हरिस रौफला दुखापत झाली होती, मात्र तो तंदुरुस्त झाला आहे. याच सामन्यात नसीम शाहला दुखापत झाली होती.

नसीम शाहला शस्त्रक्रिया करावी लागणार असून तो पुढील तीन-चार महिने क्रिकेटच्या मैदानापासून लांब राहणार आहे, असे पीसीबीच्या वैद्यकीय पथकाने म्हटले आहे. यादरम्यान वर्ल्डकप संघातून वगळल्यानंतर नसीम शाहची सोशल मीडियावर एक पोस्ट व्हायरल होत आहे.

नसीम शाहने आपल्या सोशल मीडिया पोस्टमध्ये लिहिले आहे की, 'मी खुप जड अंतःकरणाने सांगत आहे की, मी माझ्या प्रिय देशाचे प्रतिनिधित्व करणाऱ्या या अद्भुत संघाचा भाग नसणार आहे. मी खूप निराश आहे पण मला विश्वास आहे की सर्व काही अल्लाहच्या हातात आहे, इंशाअल्लाह मी लवकरच मैदानात परतेन. माझ्या सर्व चाहत्यांनी प्रार्थना केल्याबद्दल त्यांचे आभार.

आयसीसी वर्ल्डकपसाठी पाकिस्तानचा संघ -

बाबर आझम (कर्णधार), शादाब खान (उपकर्णधार), शाहीन शाह आफ्रिदी, मोहम्मद रिझवान, इमाम-उल-हक, फखर जमान, सलमान अली आगा, हरिस रौफ, मोहम्मद नवाज, सौद शकील, मोहम्मद वसीम जूनियर, अब्दुल्ला शफीक , इफ्तिखार अहमद, हसन अली, उसामा मीर.