पॅरिस : अंतिम शर्यतीपूर्वी झालेला पाऊस, त्यामुळे काहीशा आल्हाददायक वातावरणात महिलांच्या शंभर मीटर शर्यतीत सातव्या लेनमध्ये असलेल्या विश्वविजेत्या अमेरिकेच्या शा कारी रिचर्डसनवर सर्वांच्या नजरा होत्या, मात्र १०.७२ सेकंदात शर्यत संपली त्या वेळी कॅरेबियन बेटावरील सेंट ल्युशियाची ज्युलियन अल्फ्रेड ही नवीन विजेती म्हणून उदयास आली.
विश्वविजेतेपदानंतर आपल्या पहिल्याच ऑलिंपिकमध्ये सुवर्णपदक जिंकण्याचे शा कारीचे स्वप्न भंगले, तसेच महिलांच्या शंभर मीटर शर्यतीत सुवर्णपदक जिंकण्याचा अमेरिकन धावपटूंचा दुष्काळ आणखी चार वर्षे वाढला.
अंतिम शर्यतीपूर्वी मी उसेन बोल्टच्या अनेक प्रसिद्ध विजयी शर्यतींचे व्हिडिओ पाहिले व त्यातून मला प्रोत्साहन मिळाले, अशी कबुली ज्युलियनने शर्यतीनंतर दिली. या सुवर्णपदकामुळे ती ऑलिंपिकमध्ये केवळ पदकच नव्हे, तर सुवर्णपदक जिंकणारी सेंट ल्युशियाची पहिली खेळाडू ठरली आहे.
यंदा विश्व इनडोअर ॲथलेटिक्स स्पर्धेत ६० मीटर शर्यतीचे सुवर्णपदक जिंकणाऱ्या २३ वर्षीय ज्युलियनने सहाव्या लेगमधून धावताना उपांत्य फेरीप्रमाणे अंतिम फेरीतही वेगवान प्रारंभ केला. उपांत्य फेरीप्रमाणे अंतिम फेरीतही शा कारीचा प्रारंभ संथ होता.
शेवटच्या ३० मीटरमध्ये शा कारीने वेग वाढविला, मात्र तोपर्यंत अमेरिकेतील टेक्सास विद्यापीठात शिक्षण घेत असलेली ज्युलियन एक मीटरपुढे निघून गेली होती. अखेर तिने १०.७२ सेकंदाच्या आपल्या राष्ट्रीय विक्रमासह दिमाखात अंतिम रेषा पार केली आणि आनंदोत्सव साजरा करण्यास सुरुवात केली. ती आता २०० मीटर शर्यतीत सहभागी होणार आहे.
शा कारीला १०.८७ सेकंदात रौप्यपदकावर समाधान मानावे लागले. ज्युलियनची सरावातील सहकारी अमेरिकेचीच मेलिसा जेफरसन १०.९२ सेकंदात ब्राँझपदकाची मानकरी ठरली. २००८ व १२ ची विजेती जमैकाची शेली ॲन फ्रेझर हिने उपांत्य फेरीतून माघार घेतली होती.
दरम्यान, ४-४०० मीटर मिश्र रिले शर्यतीत नेदरलँडने प्राथमिक फेरीत विश्वविक्रम करणाऱ्या अमेरिकेवर मात करीत सुवर्णपदक जिंकले. अमेरिका संघाला रौप्यपदकावर समाधान मानावे लागले. पुरुषांच्या गोळाफेकीत अमेरिकेच्या रायन क्रौझरने २२.९० मीटरवर गोळा फेकत सलग तिसरे सुवर्णपदक जिंकले. महिलांच्या तिहेरी उडीत डॉमनिका प्रजाकसत्ताकच्या विश्व इनडोअर स्पर्धेतील विजेत्या थिआ लेफाँडने १५.०२ मीटर कामगिरीसह आपल्या देशाला पहिले सुवर्णपदक मिळवून दिले.
२०१७ - १०० मीटर - कॉमनवेल्थ युथ गेम्स - सुवर्णपदक
२०१८ - १०० मीटर - युथ ऑलिंपिक - रौप्यपदक
२०२२ - १०० मीटर - राष्ट्रकुल क्रीडा स्पर्धा - रौप्यपदक
२०२३ - १०० मीटर - जागतिक स्पर्धा - पाचवे स्थान
२०२३ ०- २०० मीटर - जागतिक स्पर्धा - चौथे स्थान
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.