India vs New Zealand : टी-20 विश्वचषक 2022 च्या उपांत्य फेरीतून बाहेर पडल्यानंतर भारतीय संघ आता न्यूझीलंडचा दौरा करणार आहे. तीन टी-20 मालिकेतील पहिला सामना शुक्रवारी वेलिंग्टनमध्ये खेळवला जाणार आहे. या दौऱ्यात रोहित-विराट आणि राहुलसारख्या खेळाडूंना विश्रांती देण्यात आल्याने या मालिकेत टीम इंडिया युवा खेळाडूंसह मैदानात उतरणार आहे. आता या दिग्गज फलंदाजांच्या अनुपस्थितीत एक प्रश्न आहे की भारतीय संघाची फलंदाजी कशी असेल? फलंदाजी क्रमातील सर्वात महत्त्वाचा प्रश्न ओपनिंग पोझिशनला कोण असणार आहे.

हेही वाचा : Gautami Patil- लावणीचा बाजच अश्लीलतेचा?

टी-20 मालिकेत भारतीय सलामीवीर कोण असेल? या प्रश्नाचे उत्तर पांड्या आणि लक्ष्मणच्या जोडीला शोधावे लागेल. भारतीय संघात सलामीचे अनेक दावेदार आहेत पण ओपनिंग कोण करणार हा प्रश्न आहे. ऋषभ पंत हा न्यूझीलंड टी-20 मालिकेत संघाचा उपकर्णधार असून या खेळाडूला सतत सलामी देण्याची मागणी होत आहे. पंतलाही इंग्लंडविरुद्ध सामन्यात संधी मिळाली पण त्याची बॅट चालली नाही. कारकिर्दीच्या सुरुवातीच्या काळात पंत हा फक्त सलामीवीर होता आणि अशा परिस्थितीत त्याला टॉप 2 पोझिशनमध्ये खेळता येईल का? तसे, सलामीवीर म्हणून पंत हा एक चांगला पर्याय असू शकतो.

दुसरा डावखुरा फलंदाज सलामीचा पर्याय आहे, तो म्हणजे इशान किशन. त्याने प्रत्येक वेळी आपली ताकद दाखवली आहे. किशनने टी-20 इंटरनॅशनलमध्येही चांगली खेळी केली आहे. मात्र, त्याला टी-20 विश्वचषक संघात स्थान मिळू शकले नाही. आता इशान किशनला 2024 टी-20 विश्वचषक पाहता अधिक परिपक्व बनवता येईल.

संजू सॅमसन हा देखील सलामीचा पर्याय आहे. हा खेळाडू मधल्या फळीतही चांगली कामगिरी करत असला आणि टीम इंडियाचा पुढचा फिनिशर मानला जात असला तरी टी-20 फॉरमॅटमध्ये सॅमसन सलामीवीर म्हणून कहर करू शकतो. त्याच्याशिवाय शुभमन गिलही सलामीचा दावेदार आहे. हा उजव्या हाताचा फलंदाज आयपीएलमध्येच सलामी करतो. याशिवाय गिलला एकदिवसीय आणि कसोटी फॉरमॅटमध्येही सलामीचा चांगला अनुभव आहे.