South Africa vs India Series : टी-20 मालिका संपल्यानंतर भारतीय संघ रविवारपासून दक्षिण आफ्रिकेविरुद्ध तीन सामन्यांची वनडे मालिका खेळणार आहे. टी-20 मालिका 1-1 अशी बरोबरीत राहिली. आता वनडे मालिका जिंकण्याकडे सर्वांचे लक्ष लागले आहे.

मात्र मालिका सुरू होण्याच्या एक दिवस आधी भारताला धक्का बसला आहे. संघाचे स्टार वेगवान गोलंदाज दीपक चहर आणि दुसरा मोहम्मद शमी हे दोघेही बाहेर गेले आहेत.

दीपक चहरने एकदिवसीय मालिकेतून आपले नाव मागे घेतले आहे. तर शमी हा कसोटी संघाचा भाग होता, मात्र तो मालिकेतून बाहेर आहे. बीसीसीआयने एक निवेदन जारी करून ही माहिती दिली आहे.

नुकत्याच झालेल्या एकदिवसीय वर्ल्ड कपध्ये शमीने शानदार गोलंदाजी केली होती. एकदिवसीय वर्ल्ड कपमध्ये सर्वाधिक विकेट घेणारा तो गोलंदाज होता. यानंतर तो जखमी झाल्याने त्याला विश्रांती देण्यात आली. त्यामुळे तो दक्षिण आफ्रिका दौऱ्यावर जाऊ शकणार नाही.

तर दीपक चहर कौटुंबिक कारणामुळे या दौऱ्यातून आपले नाव मागे घेतले आहे. भारतात ऑस्ट्रेलिया विरुद्ध खेळल्या गेलेल्या पाच सामन्यांच्या टी-20 मालिकेतील शेवटच्या दोन सामन्यांसाठी त्याचा टीम इंडियात समावेश करण्यात आला होता. चौथ्या सामन्यातही तो खेळला पण पाचव्या सामन्यात घरी गेला. त्यावेळी वडिलांची तब्येत बरी नसल्याच्या बातम्या आल्या होत्या. याच कारणामुळे दीपक दक्षिण आफ्रिका दौऱ्यावरही गेला नाही.

दीपक चहरने एकदिवसीय मालिकेतून आपले नाव मागे घेतल्यानंतर निवड समितीने त्याच्या जागी आकाश दीपला वनडे संघात स्थान दिले आहे. बंगालचा आकाश आयपीएलमध्ये रॉयल चॅलेंजर्स बंगळुरूकडून खेळतो. मात्र, शमीच्या बदलीबाबत बीसीसीआयने अद्याप काहीही सांगितलेले नाही.