Shikhar Dhawan Took Funny Catch : भारत आणि बांगलादेश यांच्यातील वनडे मालिकतील पहिल्या वनडे सामन्यात भारताचे क्षेत्ररक्षण हे अत्यंत सुमार दर्जाचे झाले होते. दुसऱ्या सामन्यात देखील भारताने काही झेल सोडलेच. दरम्यान, भारताच्या क्षेत्ररक्षणाचा घसरलेला स्तर दाखवणारा एक व्हिडिओ सध्या सोशल मीडियावर व्हायरल होत आहे. या व्हिडिओत भारताचा अनुभवी फलंदाज शिखर धवनने शाकिब अल हसनचा कसा हास्यास्यपद प्रकारे झेल पकडला हे दिसते.

शिखर धवन तसा सेफ फिल्डिर म्हणून गणला जातो. मात्र संघातील गचाळ क्षेत्ररक्षणाचे वारे त्यालाही लागले. बांगलादेश फलंदाजी करत असताना 17 व्या षटकात शाकिब अल हसनने वॉशिंग्टन सुंदरच्या षटकातील शेवटच्या चेंडूवर एक मोठा फटका मारण्याचा प्रयत्न केला. मात्र चेंडू शाकिबच्या बॅटची कडा घेऊन वर उडाला. यावेळी शॉर्ट फाईन लेगला उभा असणारा शिखर धवन झेल घेण्यासाठी सरसावला. याचबरोबर मोहम्मद सिराज देखील या कॅचसाठी प्रयत्न करताना दिसला.

दरम्यान, दोघेही कॅच घेण्यासाठी आल्याने शिखर धवनच्या हातातून चेंडू निसटला. मात्र गब्बरने हा चेंडू आपल्या दोन्ही पायांच्या गुडघ्यांमध्ये अलगत पकडत झेल पूर्ण केला. दरम्यान, गब्बर झेल पकडतो की नाही हे पाहण्याच्या उत्सुकतेत वॉशिंग्टन सुंदर जमिनीवरच झोपला. अखेर गब्बरने शड्डू ठोकत आपण हाताने नाही तर पायानेही झेल पकडू शकतो हे दाखवून दिले.

बांगलादेशने दुसऱ्या सामन्यात नाणेफेक जिंकून प्रथम फलंदाजी करत 50 षटकात 7 बाद 271 धावा ठोकल्या. बांगलादेशकडून मेहदी हसन मिराझने नाबाद शतकी तर मोहम्मदुल्लाने 77 धावांची झुंजार खेळी केली. भारतीय गोलंदाजांनी डावाच्या सुरूवातीला बांगलादेशला धक्क्यावर धक्के देत त्यांची अवस्था 6 बाद 69 धावा अशी केली होती. मात्र मेहदी हसन मिराझने मोहम्मदुल्लाच्या (77) साथीने सातव्या विकेटसाठी 147 धावांची दमदार भागीदारी रचली.