गेल्यावर्षी भारतीय संघाचा सलामीवीर शिखर धवन याने पत्नी आयेशासोबत घटस्फोट घेतला आहे. नऊ वर्षांच्या संसारानंतर शिखर धवन आणि आयेशा यांनी विभक्त होण्याचा निर्णय घेतला. दरम्यान शिखर धवनने घटस्फोटावर कोणतीही प्रतिक्रिया दिलेली नाही. मात्र, तो सध्या कुणाच्या तरी प्रेमात पडला असल्याची चर्चा क्रिकेट जगतात रंगली आहे.

धवनने त्याच्या अधिकृत इंस्टाग्राम अकाऊंटवर घोडेस्वारीचा व्हिडीओ शेअर केला आहे. व्हिडिओत तो घोडेस्वारीचा पुरेपूर आनंद लुटताना दिसत आहे. या व्हिडिओच्या बॅकग्राउंडला त्याने हिंदी चित्रपटातील ‘मैं तुझे कबूल’, या गाण्याची जोड दिली आहे. इतकेच नव्हे तर त्यानं ‘मोहब्बत में बादशाह भी गुलाम बन जाता है.’अशी खास कॅप्शनदेखील दिली आहे. त्याचा हा व्हिडीओ पाहूनर गब्बर पुन्हा प्रेमात पडला अशी चर्चा क्रिकेट जगतात रंगली आहे.

नऊ वर्षांचा संसार मोडला

ऑक्टोबर २०१२ मध्ये शिखर धवनने आयेशा मुखर्जीसोबत लग्न केलं होतं. आयेशाचं हे दुसरं लग्न होतं. आयेशाला पहिल्या पतीपासून दोन मुली आहेत. शिखर आणि आयेशा यांना एक सात वर्षाचा मुलगा असून त्याचं नाव जोरावर आहे. २०१४ मध्ये जोरावरचा जन्म झाला. मेलबर्नमध्ये राहणारी आयेशा मुखर्जी लग्नाच्या नऊ वर्षांनी शिखर धवनपासून विभक्त झाली.

धवननं गाजवलय आयपीएलचं मैदान

पंजाब किंग्जकडून खेळताना धवनने आयपीएल २०२२ मध्ये १४ सामन्यांत ३८.३३ च्या सरासरीने ४६० धावा केल्या आहेत. यादरम्यान त्याने ३ अर्धशतके झळकावली. तसेच त्याची सर्वोच्च वैयक्तिक खेळी नाबाद ८८ धावा इतकी राहिली आहे. ही त्याची एका हंगामात ४०० पेक्षा जास्त धावा करण्याची सलग सातवी वेळ आहे.