IND vs BAN Shreyas Iyer : भारताने श्रीलंकेचा 41 धावांनी पराभव करत दिमाखात आशिया कप 2023 ची फायनल गाठली. आता भारताचा सामना हा आधीच फायनलच्या रेसमधून बाहेर गेलेल्या बांगलादेशविरूद्ध 15 ऑक्टोबरला होणार आहे. या सामन्यापूर्वी आज (दि. 14) भारतीय संघाने ऐच्छिक सराव केला.

या सरावाला विराट कोहली, रोहित शर्मा, हार्दिक पांड्या, जसप्रीत बुमराह यांनी दांडी मारली. त्यांनी आराम करणं पसंत केलं. मात्र याच सरावसत्रादरम्यान भारतासाठी एक दिलासा देणारी गोष्ट समोर आली.

पाठीच्या दुखापतीमुळे आशिया कपमधील पाकिस्तान आणि श्रीलंकेविरूद्धचा सामना न खेळणाऱ्या श्रेयस अय्यरने आज नेटमध्ये फलंदाजीचा कसून सराव केला. तो चांगल्या प्रकारे फलंदाजी करत होता.

सलग तीन दिवस सामना खेळणाऱ्या भारतीय संघाला अखेर बुधवारी सुट्टी मिळाली होती. मात्र शुक्रवारी होणाऱ्या भारत - बांगलादेश सामन्यासाठी त्यांना गुरूवारी सराव करणे गरजेचे होते. संघ व्यवस्थापनाने हे सराव सत्र ऐच्छिक ठेवले होते. त्यामुळे संघातील अनेक वरिष्ठ खेळाडूंनी विश्रांती घेणेच पसंत केले.

हार्दिक पांड्या, जसप्रीत बुमराह आणि मोहम्मद सिराज यांनी वर्कलोड मॅनेजमेंटनुसार नेट्समध्ये सराव केला नाही. सलग सामना खेळणारे रोहित शर्मा आणि विराट कोहलीने देखील सराव सत्राला दांडी मारली.

या ऐच्छिक सरावात श्रेयस अय्यर सोबत फक्त शार्दुल ठाकूर, सूर्यकुमार यादव, रविंद्र जडेजा आणि तिलक वर्मा यांनी सहभाग नोंदवला. आनंदाची गोष्ट म्हणजे श्रेयस अय्यरने पुन्हा फलंदाजी करण्यास सुरूवात केली आहे. तो पाठीच्या दुखापतीतून सावरत आहे. तो पाकिस्तान आणि श्रीलंका यांच्याविरूद्धच्या दोन्ही सामन्यांना मुकला होता.

मात्र आता तो फलंदाजी करू लागला असल्याने हे भारतीय क्रिकेट संघासाठी चांगले संकेत आहेत. आशिया कपनंतर भारतीय संघ ऑस्ट्रेलियाविरूद्ध देखील तीन वनडे सामन्यांची मालिका खेळणार आहे.

आशिया कपसाठीचा भारतीय संघ :

रोहित शर्मा, शुभमन गिल, विराट कोहली, केएल राहुल, इशान किशन, हार्दिक पांड्या, रविंद्र जडेजा, शार्दुल ठाकूर, कुलदीप यादव, जसप्रीत बुमराह, मोहम्मद सिराज, मोहम्मद शमी, सूर्यकुमार यादव, अक्षर पटेल, श्रेयस अय्यर, प्रसिद्ध कृष्णा, तिलक वर्मा.

(Sports Latest News)