Sri Lanka vs India, 3rd ODI : श्रीलंकेविरुद्धच्या तिसऱ्या आणि अखेरच्या वनडे सामन्यात सूर्यकुमार यादवने (Suryakumar Yadav) संघासाठी उपयुक्त खेळी केली. त्याने 37 चेंडूत केलेल्या 40 धावांच्या जोरावर भारतीय संघाला 200 + धावा करणे शक्य झाले. त्याच्याशिवाय पहिल्यांदाच संघात स्थान मिळालेल्या संजू सॅमसनने (Sanju Samson) 46 चेंडूत 46 धावा आणि सलामीवीर पृथ्वी शॉने 49 धावांची खेळी केली. या तिघांशिवाय अन्य कोणालाही नावाला साजेसा खेळ करता आला नाही.

भारतीय डावात सूर्यकुमार यादव खेळत असतानाचा घडलेल्या घटनेची सध्या सोशल मीडियावर चांगलीच चर्चा सुरु आहे. भारतीय डावातील 23 व्या षटकात प्रवीण जयविक्रमाच्या (Praveen Jayawickrama) गोलंदाजीव स्वीप फटका खेळण्याच्या नादात सूर्यकुमार फसला. चेंडू पॅडवर आदळल्यानंतर जय विक्रमाने जोरदार अपिल केली. मैदानातील पंच कुमार धर्मसेना यांनी गोलंदाजाच्या बाजूने निर्णय देत सूर्याला आउट दिले.

त्यानंतर सूर्यकुमार यादवने रिव्ह्यू घेतला. रिप्लायमध्ये चेंडू लेग स्टंपवर जात असल्याचे दिसत असल्यामुळे श्रीलंकन खेळाडूंनी सूर्याच्या विकेटचा आनंद व्यक्त करण्यास सुरुवात केली. पण थर्ड अंपायरच्या निर्णयाने सूर्याचा रिव्ह्यू सार्थ ठरला. श्रीलंकन खेळाडूंचा आनंद काही क्षणातच होत्याचा नव्हता झाला. हा व्हिडिओ सोशल मीडियावर चांगलाच व्हायरल होत आहे. श्रीलंकन खेळाडूंचा जणू पोपटच झाला अशा प्रतिक्रिया सोशल मीडियावर उमटताना दिसत आहेत.

चाहत्यांना या व्हिडिओमधून आनंद मिळाला एवढेच काही या सामन्यात भारताच्या बाजूने घडले. सूर्याला या संधीच मोठ्या खेळीत रुपांतर करण्यात अपयश आले. धनंजय डी सिल्वाने त्याला पायचित केले. तिसऱ्या आणि अखेरच्या वनडे सामन्यात पावसाने व्यत्यय आल्याने सामना प्रत्येकी 47-47 षटकांचा करण्यात आला. भारतीय संघाला एवढी षटकेही खेळता आली नाहीत. भारतीय संघाचा डाव 43.1 षटकात 225 धावांतच आटोपला.