दांबुला : भारतीय महिला क्रिकेट संघ आणि श्रीलंका महिला क्रिकेट संघ यांच्यातील दुसऱ्या टी 20 सामन्यात प्रथम फलंदाजी करणाऱ्या श्रीलंकेने भारतासमोर 126 धावांचे आव्हान ठेवले आहे. श्रीलंकेकडून सलामीवीर विशमी गुणरत्ने आणि चामरी आटापटू यांना 87 धावांची सलामी दिली. या दोघींनी भारतीय गोलंदाजांना 14 व्या षटकापर्यंत एकही यश मिळू दिले नाही. गुणरत्नेने 50 चेंडूत 45 धावांची तर आटापटूने 41 चेंडूत 43 धावांची खेळी केली. (Sri Lanka Women vs India Women 2nd T20I India Restrict Sri Lanka on 125 runs)

मात्र पूजा वस्त्राकरने आटापटूला बाद करत ही जोडी फोडली. त्यानंतर हरमनप्रीत कौरने गुणरत्नेला 45 धावांवर बाद करत दोन्ही सेट झालेले फलंदाज माघारी धाडले. यानंतर भारतीय संघाने सामन्यावर आपली पकड मिळवण्यास सुरूवात केली. 17 षटकात 2 बाद 106 धावा करणाऱ्या श्रीलंकेची अवस्था भारताने 20 षटकात 7 बाद 125 अशी केली. आटापटू आणि गुणरत्ने बाद झाल्यानंतर श्रीलंकेच्या एकाही फलंदाजाला दुहेरी आकडा गाठता आला नाही.

भारताकडून दिप्ती शर्माने सर्वाधिक दोन विकेट घेतल्या. तर रेणुका सिंह, राधा यादव, पूजा वस्त्राकर आणि हरमनप्रीत कौरने प्रत्येकी 1 विकेट घेतली. श्रीलंकेचे 126 धावांचे आव्हान घेऊन मैदानात उतरलेल्या भारताला चौथ्या षटकात पहिला धक्का बसला. शेफाली वर्मा 10 चेंडूत 17 धावा करून बाद झाली.