नवी दिल्ली : सुनिल गावसकर हे भारताचे कसोटीत 10 हजार धावा पूर्ण करणारे पहिले फलंदाज आहेत. नुकतेच इंग्लंडचा माजी कर्णधार जो रूटने देखील कसोटीत 10 हजार धावा पूर्ण करण्याचा मान पटकावला. जो रूट सध्या कसोटीत शतकांचा रतीब घालत आहे. यामुळेच अनेक आजी माजी क्रिकेटर जो रूट मास्टर ब्लास्टर सचिन तेंडुलकरचा कसोटीत सर्वाधिक धावा करण्याचा विक्रम मोडणार का अशी चर्चा करत आहेत. यावर दिग्गज सुनिल गावसकर यांनी देखील आपले मत व्यक्त केले. (Sunil Gavaskar Statement About Joe Root Will Break Sachin Tendulkar Test Runs Record)

इंडिया टुडेला दिलेल्या मुलाखतीत सुनिल गावसकर म्हणाले की, 'ते एक सर्वात कठिण असे रेकॉर्ड आहे. आपण अजून जवळपास 6 हजार धावा करण्याबाबत बोलत आहोत. याचा अर्थ तुम्हाला पुढची 8 वर्षे 1000 ते 800 धावा कराव्या लागतील.'

गावसकर पुढे म्हणाले की, 'जो रूटचे वय त्याच्या बाजूने आहे. तो हे रेकॉर्ड मोडू शकतो जर त्याने धावा करण्याचा हा उत्साह कायम ठेवला तर. अॅलेस्टर कूक निवृत्तीनंतरही प्रथम श्रेणी क्रिकेट खेळत आहे. तुम्ही खूप काळ खेळत असला त्यावेळी तुमचा फॉर्म देखील जाऊ शकतो. कारण तुम्हाला मानसिक थकवा येतोच. रूट सध्या 150 धावांपेक्षा जास्त धावा करत आहे. याचा कधी ना कधी त्याच्या मानसिकतेवर आणि शारीरिकदृष्ट्या देखील परिणाम होणार.'

दिग्गज सुनिल गावसकरांनी याबाबत सर्वाधिक कोसटी विकेटच्या विक्रमाचे उदाहरण दिले. ते म्हणाले, 'खेळात काहीही होऊ शकते. आपल्याला सुरूवातीला रिचर्ड हेडलींचे 431 विकेट्सचे रेकॉर्ड मोडले जाणार नाही असे वाटत होते. मात्र कर्टनी वॉल्श आला आणि त्याने 519 विकेट घेतल्या हा सिलसिला पुढे असाच सुरू आहे. त्यामुळे रेकॉर्ड मोडणे अशक्य नाही मात्र खूप खूप कठिण आहे.'

सचिन तेंडुलकरने 24 वर्षे आंतरराष्ट्रीय क्रिकेट खेळले. त्याने त्यात 200 कसोटी सामन्यांमध्ये 15921 धावा केल्या. त्याची सरासरी 53 आहे. सचिन हा एकमेव फलंदाज आहे ज्याने कसोटीत 50 पेक्षा जास्त शतके ठोकली आहेत.