Suryakumar Yadav WI vs IND T20 : सलग दोन टी-20 सामन्यांमधील पराभवानंतर तिसऱ्या टी-20 सामन्यात भारताने वेस्ट इंडिजचा 7 गडी राखून पराभव करून मालिका जिंकण्याच्या आपल्या आशा जिवंत ठेवल्या. वेस्ट इंडिजने भारताला विजयासाठी 160 धावांचे लक्ष्य दिले होते. टीम इंडियाने 17.5 षटकात 3 विकेट गमावत 164 धावा करत शानदार विजय नोंदवला. भारताच्या या विजयाचा हिरो ठरला सूर्यकुमार यादव. त्याला सामनावीराचा पुरस्कार देण्यात आला. यादरम्यान त्याने एकदिवसीय क्रिकेटवर मोठे वक्तव्य केले.

सूर्यकुमार यादवने प्लेअर ऑफ द मॅच दरम्यान आपल्या एकदिवसीय कारकिर्दीबद्दल सांगितले की, माझी एकदिवसीय सामन्यातील कामगिरी खूपच खराब आहे, ते स्वीकारायला मला लाज वाटत नाही कारण प्रामाणिकपणा अधिक महत्त्वाचा आहे. राहुल सर आणि रोहितने मला अधिक सराव करायला आणि परिस्थितीनुसार खेळायला सांगितलं. आता संघासाठी कामगिरी करणे आणि आलेल्या संधींचा पुरेपूर उपयोग करणे हे माझ्यावर अवलंबून आहे.

सूर्यकुमार 44 चेंडूत 83 धावा करून बाद झाला. त्याने आपल्या खेळीत 10 चौकार आणि 4 षटकार मारले. तिसऱ्या विकेटसाठी 87 धावांची भागीदारी करत सामना उलथवून लावला. त्याचे हे टी-20 कारकिर्दीतील 14 वे अर्धशतक होते.

सूर्यकुमार यादवने तिसर्‍या टी-20 मध्ये सामनावीराचा पुरस्कार पटकावताच रोहित शर्माच्या पुढे गेला. 51व्या टी-20 सामन्यात सूर्याचा हा 12वा पुरस्कार पटकावला. रोहित शर्माने 148 सामन्यांमध्ये 11 वेळा सामनावीराचा पुरस्कार पटकावला आहे. भारताकडून टी-20 मध्ये सर्वाधिक वेळा प्लेयर ऑफ द अवॉर्ड जिंकण्याचा विक्रम विराट कोहलीच्या नावावर आहे. विराटने 115 सामन्यांत 15 वेळा हा पुरस्कार जिंकला आहे.