अँटिग्वा : वेस्ट इंडीजमध्ये सुरू असलेल्या 19 वर्षाखालील वर्ल्डकप (ICC Under 19 Cricket World Cup ) स्पर्धेत उपांत्यापूर्व फेरीतील सामन्यात भारताने (India) गतविजेत्या बांगलादेशचा 5 विकेट्सनी पराभव केला. भारताने नाणेफेक जिंकून प्रथम गोलंदाजी करत बांगलादेशला १११ धावात रोखले. भारताकडून (India national cricket team) डावखुऱ्या रवी कुमारने (Ravi Kumar) अप्रतिम मारा करत पॉवर प्लेमध्येच बांगलादेशी फलंदाजीचे कंबरडे मोडले. त्याच्या सुरेख स्विंग गोलंदाजीचा (Left Arm In Swing Bowling) व्हिडिओ सध्या सोशल मीडियावर व्हायरल होत आहे. त्याची गोलंदाजी पाहून भारताचा दिग्गज डावखुरा वेगवान गोलंदाज जहीर खानची (Zaheer Khan) आठवण झाल्याशिवाय राहणार नाही. (U19 World Cup Indian Left Arm Fast Bowler Ravi Kumar Reminds Legend Zaheer Khan)

भारताचा कर्णधार यश धूलने (Yash Dhul) नाणेफेक जिंकून प्रथम गोलंदाजी करण्याचा निर्णय घेतल्यानंतर दुसरेच षटक टाकण्यासाठी आलेल्या रवी कुमारने आपल्या पहिल्या षटकापासूनच बांगलादेशला धक्के देण्यास सुरूवात केली. त्याने दुसऱ्याच षटकात महफिजुल इस्लामला (Mahfijul Islam) २ धावांवर बाद करत पहिला धक्का दिला. त्यानंतर सहाव्या षटकात इफ्तकार हुसैनला १ आणि आठव्या षटकात प्रांतिक नाबिलला ७ धावांवर बाद करत बांगलादेशची अवस्था ३ बाद १४ धावा अशी करून टाकली. रवी कुमारच्या या भेदक गोलंदाजीमुळेच भारत बांगलादेशला १११ धावात रोखू शकले.

याच रवी कुमारने महफिजुल इस्लामचा एका अप्रतिम इन स्विंगवर उडवलेल्या त्रिफळ्याचा व्हिडिओ सध्या इन्स्टाग्रामवर व्हायरल होत आहे. आयसीसीने (ICC) देखील आपल्या इन्स्टाग्राम अकाऊंटवर हा व्हिडिओ शेअर केला आहे. इथूनच भारताने बांगलादेशच्या फलंदाजीला भगदाड पाडायला सुरूवात केली होती.