Wasim Akram on Babar Azam : नेदरलँड्सविरुद्ध दक्षिण आफ्रिकेचा पराभव आणि बांगलादेशविरुद्धच्या विजयानंतर पाकिस्तानचा संघ टी-20 विश्वचषक 2022 च्या उपांत्य फेरीत पोहोचला. पाकिस्तानशिवाय भारत, न्यूझीलंड आणि इंग्लंडच्या संघाने उपांत्य फेरीत प्रवेश केला. पहिल्या उपांत्य फेरीच्या सामन्यात पाकिस्तानचा संघ न्यूझीलंडविरुद्ध मैदानात उतरणार आहे. तर भारत 10 नोव्हेंबरला इंग्लंडविरुद्ध उपांत्य फेरीचा सामना खेळणार आहे.

यादरम्यान सोशल मीडियावर एक व्हिडिओ मोठ्या प्रमाणात व्हायरल होत आहे. या व्हायरलमध्ये पाकिस्तानचा कर्णधार बाबर आझम सेमीफायनल सामन्यापूर्वी ड्रेसिंग रूममध्ये खेळाडूंना संबोधित करत आहे. हा व्हिडिओ पाकिस्तान क्रिकेट बोर्डाने आपल्या अधिकृत ट्विटर आणि यूट्यूब हँडलवरून शेअर केला आहे. आता पाकिस्तानचा माजी कर्णधार आणि अनुभवी वेगवान गोलंदाज वसीम अक्रमने बाबर आझमच्या या व्हिडिओवर आपली प्रतिक्रिया दिली आहे.

उपांत्य फेरीत पोहोचल्यानंतर पाकिस्तान संघाचा कर्णधार बाबर आझमने आपल्या खेळाडू सोबत बोलताना दिसला. तो व्हिडिओ मोठ्या प्रमाणात व्हायरल झाला यावर पाकिस्तानचा माजी कर्णधार वसीम अक्रमचे असे मत आहे की, असे व्हिडिओ सार्वजनिक करू नयेत, असे व्हिडिओ नेहमीच गोपनीय ठेवले पाहिजेत. जर मी बाबर आझमच्या जागी असतो तर व्हिडिओ बनवण्याचे काम करणाऱ्या व्यक्तीला परवानगी दिली नसती. वसीम अक्रम म्हणतो की, कधी कधी वैयक्तिक गोष्टीही घडतात, त्यामुळे असे करू नये. त्याचवेळी ते म्हणाले की, हे योग्य नाही, पाकिस्तानशिवाय मी इतर कोणत्याही संघाला असे करताना पाहिलेले नाही.