Wi vs Ind T20 Rahul Dravid : भारतीय संघाच्या वेस्ट इंडिज दौऱ्याचा शेवट अपेक्षेप्रमाणे झाला नाही. टी-20 मालिकेतील पाचव्या सामन्यात संघाला 8 विकेटने पराभव स्वीकारावा लागला आणि मालिका 3-2 ने गमावली. या दौऱ्यातील टीम इंडियाच्या कामगिरीबाबत मुख्य प्रशिक्षक राहुल द्रविड म्हणाले की, काही वेळा एकाच वेळी सर्व फॉरमॅटमध्ये चमकदार कामगिरी करणे कठीण जाते.

टी-20 मालिकेतील पराभवानंतर पत्रकार परिषदेत बोलताना राहुल द्रविड म्हणाला की, आम्ही कसोटी आणि एकदिवसीय मालिकेत चांगली कामगिरी केली. टी-20 मध्येही आम्ही 2 सामने गमावल्यानंतर चांगले पुनरागमन करू शकलो, परंतु आम्हाला अपेक्षेप्रमाणे मालिका संपवता आली नाही. पहिल्या 2 सामन्यात आणि पाचव्या सामन्यात आम्ही काही चुका केल्या, त्यामुळे आम्हाला पराभवाला सामोरे जावे लागले. या सामन्यांमध्ये आम्ही फलंदाजी आणि गोलंदाजी या दोन्ही विभागात चांगली कामगिरी करू शकलो नाही, परंतु हा युवा संघ आहे ज्यात सातत्याने सुधारणा होत आहे.

राहुल द्रविड पुढे म्हणाला की, आम्हाला या मालिकेत युवा खेळाडूंना संधी द्यायची आहे. आम्ही काही कॉम्बिनेशन देखील वापरून पाहिले आणि आमच्यासाठी काही सकारात्मक गोष्टी होत्या. आमच्या येथे असलेल्या संघात आम्हाला काही गोष्टींमध्ये फारसे बदल करण्याची संधी मिळाली नाही, परंतु आम्ही भविष्य लक्षात घेऊन काही क्षेत्रांमध्ये सुधारणा करण्याचा प्रयत्न करू. यामध्ये आम्हाला टी-20 मध्ये आमच्या फलंदाजीत अधिक खोली आणायची आहे. मग यात कशी सुधारणा करता येईल याचा प्रयत्न केला पाहिजे, पण गोलंदाजी आक्रमण कमकुवत न करता संघात दोन्ही बाजूंचा समतोल दिसला पहिजे.