Wi vs Ind 1st ODI Suryakumar Yadav wear Sanju Samson’s jersey : कर्णधार रोहित शर्माने चौकार मारून भारतीय संघाला विजय मिळवून दिला आणि वेस्ट इंडिजचा पाच गडी राखून पराभव केला. या विजयासह टीम इंडियाने तीन सामन्यांच्या मालिकेत 1-0 अशी आघाडी घेतली आहे. नाणेफेक गमावून प्रथम फलंदाजी करताना वेस्ट इंडिजने अवघ्या 114 धावा केल्या. वेस्ट इंडिजकडून कर्णधार शाई होपने सर्वाधिक 43 धावा केल्या. त्याचवेळी भारताकडून रवींद्र जडेजाने तीन आणि कुलदीप यादवने चार बळी घेतले.

प्रत्युत्तरात भारताने इशान किशनच्या 52 धावांच्या जोरावर पाच विकेट्सवर 118 धावा केल्या आणि सामना जिंकला.

या सामन्यात जेव्हा नाणेफेकीनंतर प्लेइंग इलेव्हनची घोषणा करण्यात आली, तेव्हा संजू सॅमसनच्या चाहत्यांना पुन्हा एकदा धक्का बसला. सॅमसनची पुन्हा एकदा एकदिवसीय संघात निवड झाली आणि चाहत्यांना आशा होती की, तो वेस्ट इंडिजविरुद्ध आपली प्रतिभा दाखवण्याची संधी मिळेल.

परंतु कर्णधार रोहित शर्माने त्याच्यावर इशान किशनची निवड केली. यामुळे चाहत्यांची चांगलीच निराशा झाली, मात्र सामना सुरू झाल्यानंतर सूर्यकुमार यादवने त्यांच्या चेहऱ्यावर हसू आणले. खरं तर, पहिल्या एकदिवसीय सामन्यादरम्यान सूर्या सॅमसनची जर्सी घालून मैदानात उतरला आणि प्लेइंग इलेव्हनचा भाग नसतानाही सॅमसनला खेळाचा भाग बनवले. सामन्यादरम्यान सूर्यकुमार यादवने घातलेल्या संजू सॅमसनच्या जर्सीचे फोटो सोशल मीडियावर चांगलेच व्हायरल होत आहेत.

सामन्यात भारतीय संघाने चमकदार कामगिरी करत वेस्ट इंडिजला छोट्या धावसंख्येवर रोखले. यानंतर टीम इंडियाने बॅटिंग ऑर्डरमध्ये बरेच प्रयोग केले. रोहित शर्मा आणि विराट कोहली फलंदाजीला येण्याच्या मूडमध्ये नव्हते. ईशान आणि गिलने डावाची सुरुवात केली. सूर्यकुमार तिसऱ्या क्रमांकावर आला. हार्दिक चौथ्या क्रमांकावर तर जडेजा पाचव्या क्रमांकावर आहे. शार्दुलने सहाव्या क्रमांकावर फलंदाजी केली. मात्र, भारताच्या पाच गडी बाद झाल्याने कर्णधार रोहितला फलंदाजीसाठी उतरून सामना संपवावा लागला.

इशान किशनने सर्वाधिक 52 धावा केल्या, तर सूर्यकुमार यादव, शुभमन गिल, हार्दिक पांड्या, रवींद्र जडेजा आणि शार्दुल ठाकूर यांना संधीचा फायदा उठवता आला नाही.