World Cup Archery India Women : जागतिक तिरंदाजीतील कंपाऊंड प्रकारात अव्वल स्थानावर असलेल्या भारतीय महिला संघाने विश्वकरंडक तिरंदाजी स्पर्धेत सुवर्णपदकाची हॅट्ट्रिक केली. ज्योती सुरेखा, आदिती स्वामी आणि परनीत कौर या त्रिमूर्तींनी हा इतिहास घडवला.
तुर्कस्थान येथे झालेल्या या विश्वकरंडक तिरंदाजी (स्टेज ३) स्पर्धेत ज्योती-आदिती-परनीत या भारतीय महिला संघाने अंतिम सामन्यात सहाव्या मानांकित इस्तोनिया संघाचा २३२-२२९ असा पराभव केला. २०२४ मधील ही तिसरी विश्वकरंडक स्पर्धा आहे. यंदाच्या वर्षात शांघाय आणि येंचॉन येथे झालेल्या स्पर्धेतही भारतीय महिला संघाने सुवर्णपदकाचा सन्मान मिळवला होता.
तुर्कस्थान येथे आज स्पर्धेचा तिसरा टप्पा (स्टेड ३) पार पडला. भारताच्या या महिला संघाला पहिल्या फेरीत केवळ १० संघ असल्यामुळे पुढे चाल मिळाली. त्यानंतर अंतिम फेरी गाठताना त्यांनी अल साल्वादोर संघावर २३५-२२७ आणि तुर्कस्थानचा २३४-२२७ असा पराभव केला.
एकीकडे महिलांचा संघ इतिहास घडवत असताना क्रमवारीत अव्वल स्थानावर असलेला भारतीय पुरुष संघ अंतिम फेरीत स्थान मिळवण्यापासून थोडक्यात हुकला. प्रियांश, अभिषेक वर्मा आणि प्रथमेश फुगे यांची उपांत्य सामन्यात तुर्कस्थानकडून शूटऑफमध्ये हार झाली. दोन्ही संघांची २३६-२३६ अशी बरोबरी झाली होती, पण शूटऑफमध्ये भारतीय संघ ३०*-३० असे थोडक्यात मागे पडला.
त्यानंतर ब्राँझपदकासाठी झालेल्या सामन्यातही भारताच्या या पुरुष संघाला फ्रान्सकडून २३५-२३६ अशा निसटत्या पराभवाचा सामना करावा लागला. परिणामी त्यांना चौथ्या स्थानावर समाधान मानावे लागले.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.