Bajrang Punia Suspended News : जुलैमध्ये होणाऱ्या पॅरिस ऑलिम्पिकपूर्वी भारतीय कुस्तीपटू बजरंग पुनियाला मोठा झटका बसला आहे. मार्चमध्ये झालेल्या डोपिंग चाचणीत सहभागी न झाल्यामुळे त्याला निलंबित करण्यात आले आहे. बजरंग पुनियाने डोपिंग चाचणीत येण्यास नकार दिल्यानंतर राष्ट्रीय उत्तेजक विरोधी संस्थेने (NADA) हा निर्णय घेतला.

नाडाने 23 एप्रिल रोजी बजरंग पुनियाबाबत निलंबनाचे पत्र लिहिले होते. ज्यामध्ये नाडाने म्हटले आहे की, जोपर्यंत बजरंग पुनियाबाबत अंतरिम निर्णय होत नाही तोपर्यंत तो कोणत्याही कुस्ती स्पर्धेत भाग घेऊ शकत नाही. 65 किलो वजनी गटात पॅरिस ऑलिम्पिकसाठी पात्र ठरणे पुनियाचे स्वप्न होते, जे आता भंग पावताना दिसत आहे.

सोनीपत येथे झालेल्या चाचणीदरम्यान बजरंगने यूरीन टेस्टचा नमुना देण्यास नकार दिला होता, त्यानंतर नाडाने त्याला नमुना देण्यास सांगितले होते. नाडाने याबाबत जागतिक उत्तेजक विरोधी संस्थेला (WADA) माहिती दिली, त्यानंतर WADA ने नाडाला बजरंगला नोटीस पाठवून चाचणीला नकार का दिला याचे उत्तर मागितले.

नाडाने 23 एप्रिल रोजी बजरंगला नोटीस बजावली आणि 7 मे पर्यंत उत्तर देण्यास सांगितले. पॅरिस ऑलिम्पिक पात्रता फेरीसाठी झालेल्या राष्ट्रीय निवड चाचणीत बजरंगला पराभवाचा सामना करावा लागला होता.