आज म्हणजेच 12 जुलै रोजी देशातील प्रसिद्ध उद्योगपती मुकेश अंबानी यांचा धाकटा मुलगा अनंत अंबानी त्याची बालपणीची मैत्रीण राधिका मर्चंटसोबत विवाहबंधनात अडकणार आहे. लग्नानिमित्त येणाऱ्या पाहुण्यांच्या राहण्याची व्यवस्था 5 स्‍टार हॉटेल्समध्ये करण्यात आली असून त्यांना लग्जरी गिफ्ट्स देण्यात येत आहेत. याशिवाय रिलायन्सचे कर्मचारीही हा खास सोहळा सेलिब्रेट करत आहेत. त्यांना कंपनीकडून एक गिफ्ट बॉक्स देण्यात आला आहे.
गिफ्ट बॉक्सचे फोटो सोशल मीडियावर शेअर केले आहेत. रिलायन्सच्या अनेक कर्मचाऱ्यांनी मिळालेल्या गिफ्ट बॉक्सचे फोटो आणि व्हिडिओ सोशल मीडियावर शेअर केले आहेत. लाल रंगाच्या गिफ्ट बॉक्सवर गोल्डन कलरमध्ये लिहिले आहे, 'देवी-देवतांच्या आशीर्वादाने आम्ही अनंत आणि राधिकाचा विवाह साजरा करत आहोत.'
अनंतच्या लग्नानिमित्त अंबानी कुटुंबाने दिलेल्या गिफ्ट बॉक्समध्ये हल्दीरामच्या नमकीनची चार पाकिटे, मिठाईचा बॉक्स आणि एक चांदीचे नाणे आहे. नमकीनमध्ये हल्दीरामची आलू भुजिया शेव आणि लाइट चिवडा आहे. यापूर्वी नीता आणि मुकेश अंबानी यांनी 50 जोडप्यांचा सामूहिक विवाहही आयोजित केला होता. अंबानी कुटुंबाच्या वतीने या जोडप्यांना त्यांच्या लग्नानिमित्त एक लाख रुपयांचा चेक, सोन्याचे आणि चांदीचे दागिने, रेशन आणि घरगुती साहित्य देण्यात आले.
12 जुलैला म्हणजेच आज लग्न झाल्यानंतर 15 जुलैला रिसेप्शन आहे. पाहुण्यांना आमंत्रणासोबत चांदीचे मंदिर, पश्मिना शाल आणि बरेच काही मिळाले. अनंत आणि राधिका मर्चंटच्या लग्नाची उत्सुकता मार्चपासूनच सुरू झाली होती. सर्वप्रथम जामनगरमधील रिलायन्सच्या आलिशान इस्टेटमध्ये तीन दिवसांचा धमाकेदार कार्यक्रम झाला.