Pitra Dosh Remedies :

दोनच दिवसात हिंदू धर्मातील सर्वात पवित्र महिना सुरू होणार आहे. त्याआधी येणाऱ्या आषाढ अमावस्येला सर्वच अमावस्येत महत्त्वाचे स्थान आहे. या अमावस्येदिवशी पितृदोषातून मुक्ती मिळवण्यासाठी केलेले उपाय फायद्याचे ठरतात. 

आषाढ अमावस्येदिवशी नदीच्या पाण्यात स्नान केल्याने, नदीला नैवेद्य, सुर्यदेवाला जल अर्पण केल्याने पितृदोषातून मुक्ती मिळवता येते. पण यासोबत आणखीही काही उपाय केल्याने अनेक वर्षांपासून सुरू असलेल्या संकटांतून मुक्ती मिळवता येते.

घरी काही अडथळे येत असतील. काही कारणाने मोठी कामे थांबत असतील. तर, त्यासाठी पितृदोषाला कारणीभूत मानलं जातं.  त्यावर पिंडदान,श्राद्ध, पंचबली कर्म असे उपाय ज्योतिषशास्त्रात सांगितले आहेत. पण, आषाढ अमावस्येला दिवे प्रज्वलित करूनही यातून सुटका मिळवता येते. याबद्दल अधिक माहिती घेऊयात.

श्री कल्लाजी वैदिक विश्वविद्यालयाचे ज्योतिष विभागाध्यक्ष डॉ मृत्युञ्जय तिवारी यांनी एक वृत्तवाहिनीला दिलेल्या मुलाखतीत सांगितले आहे की, अमावस्येच्या दिवशी पूर्वज जगातून पृथ्वीवर येतात, अशी धार्मिक मान्यता आहे. ते या आशेने पृथ्वीवर येतात की त्यांच्या वंशाशी संबंधित लोक त्यांना जल अर्पण करतील म्हणजेच तर्पण करतील.

पितरांसाठी दान करणे, ब्राह्मणांना खाऊ घालणे, गाय, कावळा, कुत्रा, पक्षी इत्यादींना खाऊ घालणे. याने पूर्वज सुखी, समाधानी होतात आणि आपल्या वंशजांना सुख-समृद्धीचे आशीर्वाद देतात.

दिवा कधी लावावा?

असं म्हटलं जातं की, पूर्वज दिवसा पृथ्वीवर येतात, पण ते पृथ्वीवरून परतत असताना संध्याकाळ झालेली असते. पूर्वजांना त्यांच्या वडिलोपार्जित घरी परतताना कोणतीही अडचण येऊ नये म्हणून अमावस्येला त्यांच्यासाठी दिवे लावले जातात. यामुळे ते आनंदी होतात आणि वंशजांच्या सुखी आयुष्यासाठी आशीर्वाद देतात.

पूर्वजांसाठी दिवे लावण्याचे काय नियम आहेत

- पूर्वजांसाठी दिवे लावण्यासाठी तुम्ही मातीचे दिवे वापरू शकता. तुम्ही नवे दिवे आणा किंवा दिवाळीतील जूने दिवे स्वच्छ करून वापरा.

- अमावस्येदिवशी सायंकाळी पूर्वजांसाठी दिवे लावा. या दिव्यांमध्ये मोहरीचे तेल आणि कापसाची वात लावावी. मोहरीच्या जागी तिळाचे तेलही वापरू शकता. यापैकी जे तेल तुमच्याकडे सहज उपलब्ध असेल ते वापरा.

- दिवा प्रज्वलित करून मुख्य दरवाजाच्या बाहेर दक्षिण दिशेला ठेवा. हा दिवा पितरांना अर्पण करा. दक्षिण ही पूर्वजांची दिशा मानली जाते.