Potato Paneer Shots Recipe : पावसाळ्यात सकाळच्या नाश्त्याला काही तरी क्रिस्पी आणि चवदार खाण्याची सगळ्यांची इच्छा होते. नेहमीचे नाश्त्याचे पदार्थ या दिवसांमध्ये खायला बोअर होते. त्यामुळे, पोहे, उपमा, इडली आणि शिऱ्याला पर्याय म्हणून तुम्ही बटाट्यापासून एक पौष्टिक नाश्ता बनवू शकता.

या पदार्थाचे नाव आहे बटाटा पनीर शॉट्स. हे चवीला कुरकुरीत आणि स्वादिष्ट लागतात. सकाळच्या गडबडीत नाश्त्याला बनवण्यासाठी हा उत्तम पर्याय आहे. हे बटाटा पनीर शॉट्स तुम्ही घरच्या घरी आरामात बनवू शकता. शिवाय, हा पदार्थ बनवायला तुम्हाला फार साहित्याची गरज पडत नाही. चला तर मग जाणून घेऊयात बटाटा पनीर शॉट्सची ही सोपी रेसिपी.

बटाटा पनीर शॉट्स बनवण्यासाठी लागणारे साहित्य

• २ उकडलेले बटाटे

• पनीर क्यूब १ कप

• आले लसूणाची पेस्ट १ चमचा

• जिरे-मोहरी १ चमचा

• लाल तिखट १ चमचा

• हिरवी कोथिंबीर बारीक चिरलेली

• बेसन १ कप

• तळण्यासाठी तेल १ कप

• चवीनुसार मीठ

बटाटा पनीर शॉट्स बनवण्याची सोपी पद्धत :

• बटाटा पनीर शॉट्स बनवण्यासाठी सर्वात आधी उकडलेले बटाटे स्मॅश करून घ्या.

• त्यानंतर, त्यात आले-लसूणाची पेस्ट घालून मिक्स करा.

• दुसऱ्या बाजूला पनीरचे तुकडे करून घ्या आणि कोथिंबीर बारीक चिरून घ्या.

• त्यानंतर, एका बाऊलमध्ये बेसन घ्या आणि त्यात लाल तिखट, मीठ घाला.

• आता त्यात पाणी मिसळून मिश्रण चांगले घट्ट बनवून घ्या.

• दुसऱ्या बाजूला गॅसवर कढई गरम करायला ठेवा आणि त्यात तेल घाला.

• तेल गरम झाले की त्यात जीरे-मोहरी घाला.

• जिरे-मोहरी तडतडली की त्यात बटाट्याचे मिक्स केलेले मिश्रण घाला.

• त्यावर बारीक चिरलेली कोथिंबीर घालून चांगले परतून घ्या.

• हे मिश्रण चांगले परतले की, ते थंड करायला ठेवा.

• आता या बटाट्यापासून छोटे गोळे बनवा.

• आता या गोळ्यांच्या मधोमध पनीरचा क्यूब घाला.

• त्यानंतर, गॅसवर पॅन गरम करायला ठेवा आणि त्यात तळण्यासाठी तेल घाला.

• आता बटाट्याचे गोळे बेसनाच्या मिश्रणात बुडवून घ्या आणि तेलात तळून घ्या.

• हे गोळे सोनेरी होईपर्यंत छान तळून घ्या.

• आता तुमचे बटाटा पनीर शॉट्स खायला तयार आहे, हिरवी चटणी किंवा टोमॅटो सॉससोबत सर्व्ह करा.