Independence Day 2023 : 15 ऑगस्ट 1947 रोजी आपल्या भारत देशाला इंग्रजांच्या गुलामगिरीतून मुक्तता मिळाली होती. हा दिवस प्रत्येक भारतवासीयाकरिता अत्यंत महत्त्वाचा आहे. आपल्या देशाचा प्रत्येक नागरिक दरवर्षी 15 ऑगस्ट या दिवशी देशाचा 'स्वातंत्र्यदिन' जल्लोषात साजरा करतो. 

आपल्या देशाला स्वातंत्र्य मिळावं याकरिता त्या काळात स्वतःचा जीव पणाला लावलेल्या प्रत्येक स्वातंत्र्य सैनिकांच्या आठवणींना उजाळा देण्यासाठीही हा दिवस साजरा केला जातो. 15 ऑगस्टनिमित्ताने सोसायटी, शाळा, कॉलेजांमध्ये वादविवाद स्पर्धा, भाषण स्पर्धेचंही आयोजन केलं जाते.

स्वातंत्र्य दिनानिमित्त तुम्हालाही स्वतःचे विचार व्यक्त करायचे असतील तर आतापासूनच भाषण करण्याच्या तयारीस सुरुवात करा. भाषण उत्तम व्हावे, यासाठी कोणकोणत्या गोष्टी लक्षात ठेवणे गरजेचं आहे, ते जाणून घेऊया...

स्वातंत्र्यदिनाचे भाषण कसे असावे?

• स्वातंत्र्यदिनाचे भाषण छोटे व मुद्याला धरून असावे. प्रेक्षकांना समजण्यास सोपे असावे तसेच भाषणात प्रभावी वाक्यांचा वापर करावा. 

• स्वतःचे विचार मांडण्यासोबतच आपण थोरांचेही विचार पुन्हा एकदा भाषणाच्या माध्यमांतून प्रेक्षकांसमोर मांडू शकता. 

• प्रेक्षकांसोबत जोडले जाण्यासाठी भाषणाचा उत्तम सराव करावा. केवळ पाठ केलेला विषय आपण त्यांच्यासमोर बोलून दाखवत आहात, असे वाटू नये.  

• महत्त्वाचे म्हणजे भाषणात नमूद केलेली ऐतिहासिक माहिती अचूक असावी.

• आरशासमोर उभे राहून भाषणाचा सराव करावा, म्हणजे आपले हावभाव कसे होत आहेत, याबद्दलही तुम्हाला कल्पना येईल.    

• लिहिलेले भाषण एकदा जाणकारांकडून तपासूनही घ्यावे. 

• भाषण करताना वेशभूषाही या दिवसाला साजेशी अशी करावी.

मित्रांनो या गोष्टी लक्षात ठेवून भाषण केल्यास प्रेक्षकांकडून टाळ्यांचा कडकडाट नक्की होईल.