Independence Day 2024 : यंदा आपला भारत देश १५ ऑगस्टला ७८ वा स्वातंत्र्यदिन साजरा करणार आहे. या स्वातंत्र्यदिनाची लगबग आतापासूनच पाहायला मिळत आहे. १५ ऑगस्ट १९४७ मध्ये भारताला स्वातंत्र्य मिळाले आणि इंग्रजांच्या जुलमी राजवटीमधुन आपल्या सर्वांची सुटका झाली. स्वातंत्र्यदिनाच्या निमित्ताने देशभरातील लोक अनेक प्रकारे हा स्वातंत्र्यदिन साजरा करतात.

या दिवशी शाळा, कॉलेज, सरकारी कार्यालये, ऑफिसमध्ये देशभक्तीवर आधारित विविध कार्यक्रमांचे आयोजन केले जाते. या दिवशी अनेक जण तिरंग्यामध्ये रंगून जातात. तिरंगा थीमवर आधारित असलेले कपडे परिधान करण्यावर अनेकांचा भर असतो.

तिरंग्याच्या बांगड्या, साडी, स्कार्फ, कुर्ती, ड्रेस इत्यादी गोष्टी परिधान करण्यात महिला आघाडीवर असतात. यंदाचा स्वातंत्र्यदिन तुम्हाला खास बनवायचा असेल तर, आज आम्ही तुम्हाला काही फॅशन टिप्स देणार आहोत. त्या टिप्सच्या मदतीने तुम्ही स्वातंत्र्यदिन अधिक उत्साहात साजरा करू शकता. चला तर मग जाणून घेऊयात त्या टिप्स.

स्वदेशी कपडे

स्वातंत्र्यदिनी तुम्ही अशा प्रकारचे कपडे घाला की, ज्यामध्ये स्वदेशीचा भाव दिसून येईल. जसे की, तुम्ही हातामागावरील कपडे, खादीचे कपडे, तागाचे काप़ड, कापूस आण रेशीम इत्यादी प्रकारचे कपडे १५ ऑगस्टला परिधान करू शकता.

खास करून तुम्ही ज्या राज्यात राहता, तिथल्या हातामागावरील कपडे घाला. या कपड्यांमध्ये तुम्हाला आरामदायक वाटू शकेल आणि तुमचा लूक ही खास दिसेल.

एव्हरग्रीन पांढरा रंग

१५ ऑगस्टला अनेक महिलांचा आणि पुरूषांचा पांढऱ्या रंगाचे कपडे परिधान करण्यावर भर असतो. पांढऱ्या रंगामध्ये तुम्हाला विविध प्रकारचे पॅटर्न्स आणि कपडे देखील मिळू शकतील. तुम्ही साडी किंवा ड्रेस देखील कॅरी करू शकता.

यावर केशरी-हिरव्या रंगाची ज्वेलरी आणि हातात बांगड्या अवश्य घाला. यामध्ये तुमचा लूक अधिक सुंदर दिसेल.

तिरंगी स्वरूपातील बांगड्या

१५ ऑगस्टच्या दिवशी तुम्ही ज्या प्रकारचे कपडे परिधान कराल त्यावर ट्राय कलर अर्थात तिरंगी स्वरूपातील बांगड्या अवश्य घाला.

हिरव्या, केशरी अन् पांढऱ्या रंगाच्या बांगड्यांमध्ये तुम्हाला विविध प्रकारच्या व्हरायटी मार्केटमध्ये पाहायला मिळतील.

क्रिएटिव्ह स्टाईल

जर तुम्हाला यंदाच्या स्वातंत्र्यदिनी थोडा वेगळा लूक करायचा असेल, तर तुम्ही थोडे क्रिएटिव्ह व्हा. केशरी, हिरवा आणि पांढऱ्या रंगाचा वापर करून तुम्ही तुमचा लूक डिझाईन करू शकता. यासाठी तुम्ही या रंगांचे पेस्टल व्हेरियंट्स देखील निवडू शकता.

तसेच, वेस्टर्न आणि एथनिकसोबत मेळ साधून कपडे स्टाईल करू शकता. उदा. हिरव्या लांब स्कर्टवर तुम्ही पांढरा किंवा केशरी क्रॉप टीशर्ट परिधान करू शकता.