गेल्या वर्षभरापासून उच्छाद मांडलेल्या कोरोना विषाणूचं संकट अद्यापही टळलेलं नाही. त्यामुळे मुंबई पोलिस सातत्याने नागरिकांमध्ये जनजागृतीचं काम करत आहेत. गरजेशिवाय घराबाहेर पडू नका, सुरक्षेच्या नियमांचं पालन करा असं आवाहनदेखील सतत करत आहे. हे आवाहन करण्यासाठी आतापर्यंत त्यांनी अनेक भन्नाट युक्त्या वापरल्या आहेत. कधी चित्रपटाचे डायलॉग्स, कधी अभिनेते यांचा वापर त्यांनी केला आहे. विशेष म्हणजे यावेळी त्यांनी चक्क क्रिकेटपटू राहुल द्रविड याचा वापर केला आहे. त्यामुळे सध्या सोशल मीडियावर राहुल द्रविड आणि मुंबई पोलिस या दोघांची जोरदार चर्चा रंगली आहे.

गेल्या काही दिवसांपासून सोशल मीडियावर #Rahul Dravid # Indiranagar ka gunda hun main हे दोन हॅशटॅग चांगलेच व्हायरल झाले आहेत. एका जाहिरातीमध्ये राहुल द्रविड झळकला असून यात त्याचा कधी न पाहिलेला अंदाज पाहायला दिसून आला. मैदानात कायम शांत आणि संयमाने खेळणारा राहूल या जाहिरातीत मात्र प्रचंड आक्रमक असल्याचं दिसून आलं. त्यामुळेच त्याच्या या नव्या अंदाजाचा वापर मुंबई पोलिसांनी जनजागृतीसाठी केला आहे.

'कोरोना विषाणू तुमच्याकडे येतोय, हे मास्क पाहतोय', असं कॅप्शन देत मुंबई पोलिसांनी राहुल द्रविडचा फोटो शेअर केला आहे. या पोस्टच्या माध्यमातून मुंबई पोलिसांनी कोरोना विषाणूविषयी जनजागृती करण्याचा प्रयत्न केला आहे. विशेष म्हणजे मुंबई पोलिसांप्रमाणेच सूरत पोलिसांनीदेखील हा व्हिडीओ शेअर केला आहे.

हेही वाचा : कोरोनाला 'फूल' करुयात! मुंबई पोलिस आयुक्तांचं भन्नाट ट्विट व्हायरल

काय आहे जाहिरात?

व्हायरल होत असलेल्या जाहिरातीमध्ये राहूल द्रविड  एका गाडीमध्ये उभा राहतो आणि हातात बॅट घेऊन  "मैं इंदिरानगर का गुंडा हूँ", असं म्हणतो. त्यानंतर तो चक्क लोकांशी भांडण करताना दिसत आहे. कधी तो लोकांची वाद घालतोय, तर कधी तो बॅटने गाड्यांची तोडफोड करतोय.  विशेष म्हणजे मैदानात कायम संयमाने वागणाऱ्या राहूलचा हा नवा अंदाज पहिल्यांदाच चाहत्यांनी पाहिल्यामुळे ही जाहिरात सध्या सोशल मीडियावर चर्चिली जात आहे.