मुंबई : मुलांच्या संगोपनाचा विषय निघतो तेव्हा आईची प्रतिमा प्रथम समोर येते. आईशिवाय मुलांचे संगोपन होऊ शकत नाही, असे प्रत्येकाला वाटते. मुलं वडिलांशिवाय मोठी होतात, आईशिवाय होत नाहीत, हा डायलॉग भारतात खूप प्रसिद्ध आहे.

मुलांचे संगोपन करणे हे आईचे काम आहे असे सामान्यतः मानले जाते. तुम्हीही लहानपणापासूनच हे घडताना पाहात आला आहात की मुलं ही आईची पहिली गरज आणि वडील दुसऱ्या क्रमांकावर येतात. भारतात असे मानले जाते की फक्त आईच मुलांना वाढवू शकते. मात्र, आता ही प्रतिमा आणि धारणा बदलत असून वडीलही मुलांचे चांगले संगोपन करू शकतात, हे समोर येत आहे.

फादर्स डेच्या निमित्ताने आम्ही तुम्हाला अशाच काही सेलिब्रिटी फादर्सबद्दल सांगत आहोत जे एकट्याने मुलांना वाढवतात. एकल पालकत्व हे सोपे काम नाही आणि जर तुम्ही सेलिब्रिटी पालक असाल तर तुमचे काम आणखी कठीण होईल. चला तर मग जाणून घेऊया त्या सेलिब्रिटी वडिलांबद्दल जे आपल्या मुलांचे संगोपन एकटेच करत आहेत.

रिकी मार्टीन

ग्रॅमी विजेते रिकी मार्टिन हे दोन जुळ्या मुलांचे वडील आहेत. २००८ मध्ये सरोगसीच्या मदतीने रिकी वडील झाला. या गायकाने आपल्या एका मुलाखतीत सांगितले होते की, आपल्या लैंगिकतेमुळे तो कधीच पालक बनू शकणार नाही या भीतीमध्ये तो अनेक वर्षांपासून जगत होता.

करण जोहर

करण जोहरने फिल्म इंडस्ट्रीत उत्तम काम केले आहे आणि वैयक्तिक आयुष्यातही तो चांगला पिता आहे. २०१७ मध्ये सरोगसीच्या मदतीने करण दोन जुळ्या मुलांचा बाप झाला. करणने अनेकदा सांगितले आहे की, वडील झाल्यानंतर त्याचे आयुष्य खूप बदलले आहे.

टॉम क्रूज

टॉम क्रूझ तीन मुलांचा बाप आहे. टॉमला एक मुलगी असून त्याने दोन मुले दत्तक घेतली आहेत. टॉम म्हणतो की त्याला आयुष्यभर वडीलच राहायचे आहे आणि वाटले की त्याची मुले कोणत्याही गोष्टीसाठी त्याच्यावर अवलंबून राहू शकतात. टॉम म्हणतो की मला वाटत नाही की जास्त प्रेम मुलांना बिघडवते.

तुषार कपूर

तुषार कपूर २०१६ मध्ये सरोगसीच्या मदतीने सिंगल फादर झाला. तुषार सोशल मीडियावर आपल्या मुलांसोबत व्हिडिओ आणि पोस्ट शेअर करत असतो. तुषारने एका मुलाखतीत सांगितले होते की, त्याला नेहमीच वडील व्हायचे होते.

ब्रॅड पिट

बॉलिवूडचा लोकप्रिय अभिनेता ब्रॅड पिट हा ६ मुलांचा बाप आहे. पिट आणि त्याची पूर्वीची पत्नी एंजेलिनो जोली यांनी २००५ मध्ये डेटिंग करण्यास सुरुवात केली आणि तीन वर्षांनंतर, पिटने अँजेलिनाचा दत्तक मुलगा मॅडॉक्सला दत्तक घेतले.