पुणे : ‘‘प्रत्येक पक्षाला संघटन वाढविण्याचा अधिकार आहे. त्यासाठी प्रयत्न सुरू असतात. लोकसभा निवडणुकीत सर्वांनी चर्चा करून जिंकून येण्याच्या निकषावर जागावाटप केले आहे. आम्ही कोणाच्याही जागा कमी केलेल्या नाहीत,’’ असे मुंबई भाजपचे अध्यक्ष ॲड. आशिष शेलार यांनी सांगितले.

लोकसभा निवडणुकीच्या निमित्ताने युवा मोर्चाच्या पदाधिकाऱ्यांचा पुण्यात मेळावा आयोजित केला होता. तत्पूर्वी शेलार यांनी पत्रकार परिषदेत संवाद साधला. यावेळी प्रदेश उपाध्यक्ष राजेश पांडे, शिवसेनेचे शहरप्रमुख नाना भानगिरे, महायुतीचे समन्वयक संदीप खर्डेकर आदी उपस्थित होते.

शेलार म्हणाले, ‘‘निवडणूक देशाची असल्याने ‘मोदी विरुद्ध गांधी’ अशी होत आहे. मोदी युवकांच्या अपेक्षा पूर्ण करतील, अशी अपेक्षा राज ठाकरे यांना आहे म्हणूनच त्यांनी महायुतीला पाठिंबा दिला.’’

महायुतीमध्ये तडजोड : सामंत

महायुतीमध्ये राजकीय तडजोड आहे. नारायण राणे इच्छुक नव्हते; मग ते आता का तयार झाले? यावर आता चर्चा करून उपयोग नाही. त्यांनी अर्ज भरला आहे. महायुतीच्या जागा वाटपात एकनाथ शिंदे, देवेंद्र फडणवीस व अजित पवार यांनी सर्वांचा सन्मान करत जागा वाटप केले आहे. देशभरात आम्ही ४०० पेक्षा जास्त जागा जिंकणार असून पुणे जिल्ह्यातील चारही जागेवर महायुतीचे उमेदवार विजयी होतील, असे उद्योग मंत्री उदय सामंत यांनी पत्रकारांशी बोलताना सांगितले.

शेलार म्हणाले, ‘पराभव होणार’

पत्रकार परिषदेत बारामतीच्या जागेचे काय, असे विचारले असता सुनेत्रा पवार यांचा पराभव होणार आहे, असे शेलार चुकून बोलून गेले. चूक लक्षात येताच सुनेत्रा पवार जिंकणार आहेत, असे म्हणत सारवासारव केली.