पुणे : भाजपचे प्रदेशाध्यक्ष चंद्रशेखर बावनकुळे, उच्च व तंत्रशिक्षण मंत्री चंद्रकांत पाटील यांच्यापासून खासदार, आमदारांसह कार्यकर्त्यांनी रविवारी ‘घर चलो अभियान’ राबविले. ‘विकसित भारतासाठी भाजपला मत द्या’, ‘नरेंद्र मोदी यांना पंतप्रधान करण्यासाठी मुरलीधर मोहोळ यांना निवडून द्या’, असे आवाहन करण्यात आले. भाजपच्या दहा हजार कार्यकर्त्यांनी अडीच लाख मतदारांशी संपर्क साधला.

पक्षाच्या वर्धापन दिनानिमित्त हे अभियान सुरु आहे. रविवारी सकाळी साडे आठ वाजता १५० ते २०० कार्यकर्ते पक्षाच्या एरंडवणे येथील कार्यालयात जमले. शहराध्यक्ष धीरज घाटे यांनी मार्गदर्शन केल्यानंतर अभियान सुरू झाले. घाटे यांनी दांडेकर पूल परिसरातून नागरिकांना भेटण्यास सुरवात केली. बावनकुळे सकाळी साडे दहा वाजता अभियानात सहभागी झाले. त्यांनी अप्पा बळवंत चौकाजवळील राधा-कृष्ण सोसायटीतील आठ ते दहा सदनिकांमधील रहिवाशांशी संवाद साधला.

पाटील यांनी सकाळी नऊ वाजता डहाणूकर कॉलनीमधील रहिवाशांशी संवाद साधला. त्यांनी दोन सत्रांत नागरिकांच्या गाठीभेटी घेत पक्षाला मतदान करण्याचे आवाहन केले. खासदार प्रा. मेधा कुलकर्णी यांनी सकाळी नऊ वाजता डहाणूकर कॉलनी व वुडलॅंड सोसायटीत घरोघरी जाऊन नागरिकांच्या भेटी घेतल्या. मतदानाच्या दिवशी एक हजार ८८ सदनिकाधारकांशी संपर्क साधण्याची योजना त्यांनी आखली आहे. पक्षाचे उमेदवार मुरलीधर मोहोळ यांनी सकाळी दहा वाजता कोथरूडमधील लक्ष्मीनगर परिसरामध्ये घरोघरी जाऊन नागरिकांशी संवाद साधला.