इचलकरंजी : शहरात अनेकजणांनी मतदान करतानाचा ईव्हीएम आणि व्हीव्हीपॅटसोबतचा फोटो व व्हिडिओ सोशल मीडियावर व्हायरल केले. हे फोटो व्हायरल करणे दोन तरुणांना महागात पडले आहे. एका अज्ञात इन्स्टाग्राम अकाउंटधारक तरुणावर शिवाजीनगर पोलिस ठाण्यात (Shivaji Nagar Police Station) तर रामचंद्र शिवाजी कांबळे (वय २७, रा. खोतवाडी) याच्यावर शहापूर पोलिस ठाण्यात (Shahapur Police Station) गुन्हा दाखल झाला आहे. दोघांनी इन्स्टाग्रामवर फोटो व व्हिडिओ शेअर करत आचारसंहितेचा भंग केला.

शाहू पुतळानजीक विठ्ठल रामजी शिंदे शाळा नंबर २१ मध्ये २५३ मतदान केंद्र आहे. याठिकाणी एकाने मतदान केंद्रात मोबाईल बंदी असताना मोबाईलसह प्रवेश केला. मतदानाच्या (Voting) गुप्त प्रक्रियेकडे दुर्लक्ष केले आणि मतदान करतानाचा व्हिडिओ करत सोशल मीडियावर प्रसारित केला. तरुणाने आपल्या इन्स्टाग्राम अकाउंटवरून हा व्हिडिओ व्हायरल केला. हे निदर्शनास आल्यानंतर मतदान केंद्राध्यक्ष दादासाहेब पांडुरंग देसाई (वय ५५) यांच्या फिर्यादीनुसार ‘त्या’ तरुणावर शिवाजीनगर पोलिसांनी गुन्हा दाखल केला आहे.

तसेच खोतवाडी (ता. हातकलंगले) येथील मतदान केंद्र क्र. २४ मध्ये असाच प्रकार घडला. रामचंद्र कांबळे याने मतदान केंद्रात मोबाईल घेऊन जात मतदान केल्याचा फोटो काढला. हे फोटो त्याने इंस्टाग्रामवरील आपल्या अकाउंटवर स्टेटस ठेवला. हे पोलिसांच्या निदर्शनास आल्यानंतर पोलिस कॉन्स्टेबल आसिफ कलायगार यांच्या फिर्यादीनुसार कांबळे याच्यावर शहापूर पोलिसांनी गुन्हा दाखल करण्यात आला.

पन्हाळ्यात अज्ञातावर गुन्हा

पन्हाळा : तालुक्यातील सातार्डे मतदान केंद्रावर अज्ञाताने मतदान केंद्रात मोबाईल नेऊन व्हिडिओ काढून तो सोशल मीडियावर प्रसारित केला. याबाबत मतदान केंद्रप्रमुख बंडा कुंभार यांनी पन्हाळा पोलिस ठाण्यात गुन्हा नोंद केला.