बेळगाव : बेळगाव नगरविकास प्राधिकरण तथा ‘बुडा’ अध्यक्षपदी काँग्रेसचे नेते लक्ष्मण चिंगळे (Laxman Chingale) यांची निवड झाली आहे. रात्री उशिरा याबाबतची प्रत उपलब्ध झाली आहे. त्यामुळे ते आज कार्यभार घेण्याची शक्यता आहे. चिंगळे हे चिकोडी जिल्हा काँग्रेसचे अध्यक्ष आहेत. जिल्हा पालकमंत्री सतीश जारकीहोळी (Satish Jarkiholi) यांचे ते अत्यंत विश्वासू म्हणून ओळखले जातात.

चिकोडी लोकसभा मतदारसंघातून (Chikkodi Loksabha Constituency) काँग्रेसची उमेदवारी चिंगळे यांना मिळणार, अशी चर्चा गेल्या अनेक महिन्यापासून सुरू होती. पालकमंत्री जारकीहोळी यांनीही याबाबत सूतोवाच केले होते. पण, गेल्या काही दिवसांपासून चिकोडीमधून जारकीहोळी यांची कन्या प्रियंका यांचे नाव पुढे आले आहे.

त्यामुळे चिंगळे यांच्या उमेदवारीबाबत प्रश्नचिन्ह निर्माण झाले होते. आता त्यांची बुडा अध्यक्षपदी निवड झाल्याने त्यांना चिकोडी येथून उमेदवारी मिळणार नाही, हे जवळपास निश्चित झाले आहे. राज्यात काँगेस पक्षाचे सरकार सत्तेत येऊन एक वर्षाचा कालावधी लोटण्यास आला तरी बुडा अध्यक्ष निवड झाली नव्हती.

या पदासाठी बेळगावमधून अनेकजण इच्छुक होते. त्यांनी मोर्चेबांधणी ही केली होती. पण अखेर चिंगळे याना हे पद मिळाले आहे. लोकसभा निवडणूक जाहीर होण्याच्या आदल्‍या दिवशी बुडा अध्यक्ष निवड करून काँग्रेसने चिकोडी मतदारसंघात साखरपेरणी केल्याची चर्चा सुरू आहे. चिंगळे यांच्या माध्यमातून तब्बल एक वर्षानंतर बुडाला अध्यक्षपद मिळाले आहे.