पुणे : उन्हाचा चटका वाढत असताना दुसरीकडे लोकसभा निवडणुकीचा ज्वरही वाढत जात आहे. मात्र राज्यात आतापर्यंत झालेल्या मतदानाची टक्केवारी कमी असल्याने पुण्यातील मतदानाचा टक्का वाढणे आवश्‍यक आहे. मतदारांनी आपला हक्क बजावून लोकशाही मजबूत करावी, यासाठी पुणे महापालिकेनेही कंबर कसली आहे. २८०० बचत गटांच्या माध्यमातून घरोघरी जाऊन सुमारे साडेसात हजार महिला जनजागृती करत आहेत. चित्रकला स्पर्धा, पथनाट्य असे उपक्रमही राबविले जात आहेत.

का आली जाग?

शहरातील कात्रज, शिवाजीनगर भागातील सोसायट्यांच्या समस्यांकडे महापालिकेचे दुर्लक्ष होत असल्याने त्यांनी मतदानावर बहिष्कार टाकण्याचा इशारा दिला होता. त्यानंतर खडबडून जागे झालेल्या प्रशासनाने या समस्यांचे निवारण केले. त्याच वेळी महापालिका आयुक्त डॉ. राजेंद्र भोसले यांनी मतदानाचा टक्का वाढविण्यासाठी बैठक घेऊन विविध विभागांना जबाबदारी दिली आहे. यामध्ये समाजविकास विभागाची जबाबदारी महत्त्वाची आहे.

‘आयएलएस’ महाविद्यालयाच्या विद्यार्थ्यांनी मतदानाच्या जनजागृतीसाठी पथनाट्य तयार केले आहे. त्याचे पुणे शहरात विविध ठिकाणी सादरीकरण केले जात आहे. महापालिका आयुक्तांच्या आदेशानुसार शहरात मतदानाचा टक्का वाढविण्यासाठी समाजविकास विभागातर्फे जनजागृती केली आहे. ‘ताई मतदानाला चला’ अभियानाला प्रतिसाद मिळत आहे. चित्रकला, रांगोळी स्पर्धा यांचे नियोजन केले जात आहे. पुणे जिल्ह्यात दोन्ही टप्प्यांत जास्तीत जास्त मतदान व्हावे यासाठी प्रयत्न सुरू आहेत.

- नितीन उदास,

उपायुक्त, समाजविकास विभाग

क्षेत्रीय कार्यालयांच्या बैठकीत सूचना

बारामती लोकसभा मतदारसंघासाठी सात मे रोजी मतदान होणार आहे. त्या पार्श्‍वभूमीवर मंगळवारी (ता. ३०) कोथरूड बावधन, धनकवडी-सहकारनगर, कोंढवा-येवलेवाडी या चार क्षेत्रीय कार्यालयाच्या अधिकाऱ्यांची बैठक झाली आहे. यामध्ये जनजागृती करण्याच्या सूचना दिल्या आहेत.

अशी आहे स्थिती

• लोकसभा निवडणुकीसाठी महाराष्ट्रात दोन टप्प्यांतील मतदान झाले आहे

• तिसऱ्या टप्प्यात ७ मे रोजी पुणे जिल्ह्यातील बारामती लोकसभा मतदारसंघात, तर चौथ्या टप्प्यात १३ मे रोजी पुणे, शिरूर आणि मावळ लोकसभा मतदारसंघात मतदान

• दोन्ही टप्प्यांत पुणे शहराच्या भागाचा समावेश.

• राज्यात दोन टप्प्यांत कमी मतदान झाले आहे, त्यामुळे हक्काचा मतदार बाहेर काढून त्यांना मतदान करायला लावणे राजकीय पक्षासाठी आव्हानात्मक

असे आहेत उपक्रम

• समाजविकास विभागाकडे दोन हजार ८०० बचत गट असून, त्यातील ७ हजार ५०० महिलांना मतदान जनजागृती उपक्रमात सहभागी करून घेतले आहे

• बचत गटातील महिलांकडून त्यांच्या भागातील मतदारांमध्ये मतदानासाठी जागृती

• ‘ताई मतदानाला चला,’ ‘ताई, वहिनी, मावशी, आजी मतदानाला चला’, असे फलक लावून आवाहन केले जात आहे. त्याचा फायदा वस्ती पातळीवर होत आहे

• लहान मुलांसाठी चित्रकला स्पर्धा, महिलांसाठी रांगोळी स्पर्धा