Lok Sabha Prediction

लोकसभा निवडणुकांच्या निकाल जसे जवळ येत आहेत. तशी लोकांची उत्सुकता देखील वाढली आहे. लोकसभा निवडणुकीसाठी उद्या (शनिवार, १ जून) शेवटच्या टप्प्यासाठी मतदान होणार आहे. त्यानंतर ४ तारखेला निकाल लागणार आहेत. यावेळी संपूर्ण देशाचे लक्ष महाराष्ट्राच्या निकालावर आहे. महाराष्ट्रात झालेले राजकीय भूकंप याला कारण ठरत आहेत. दोन शिवसेना, दोन राष्ट्रवादी आणि भाजप अशी राजकीय परिस्थिती राज्यात आहे.

लोकसभा निवडणुकांबाबत अनेक राजकीय अंदाज येत आहेत. हे अंदाज नेहमी खरे नसतात पण कधी कधी बरोबर पण येतात. एका तज्ज्ञांनी भाजपबाबात धक्कादायक दावा केला आहे. यावेळी भाजपला २५० जागाही मिळवता येणार नसल्याचे जाणकारांचे म्हणणे आहे. रवी श्रीवास्तव यांनी भाजपबद्दल मोठा दावा केला आहे. यावेळी भाजपला फक्त २४० जागा मिळतील. तर दोन राज्यात पक्षाला चांगली कामगिरी करता येणार नाही. तर मित्रपक्षांना ३० जागा मिळणार आहेत. एकूण २७० जागा भाजप आणि एनडीएच्या खात्यात जातील.

रवी श्रीवास्तव यांनी इंडिया आघाडी भारताला २५९ जागा मिळण्याची शक्यता वर्तवली आहे. तर १२९ जागा एकट्या काँग्रेसच्या वाट्याला जातील, तर १३० जागा इंडिया आघाडीच्या खात्यात जाताना दिसत आहेत. अशाप्रकारे विरोधकांकडे २५९ जागांचा आकडा असेल. ५४३ पैकी २३ जागा इतर पक्षांना जातील. दक्षिण भारत, दिल्ली आणि बिहारमध्ये एनडीएपेक्षा भारत आघाडीला जास्त जागा मिळतील, असा अंदाज रवी श्रीवास्तव यांनी व्यक्त केला आहे.

यावेळी भाजपला दोन राज्यात जोरदार झटका बसण्याचा अंदाज राजकीय तज्ज्ञांनी व्यक्त केला आहे. दिल्लीतील सात जागांपैकी भाजपला एकही जागा जिंकता येणार नाही, तर दक्षिण भारतातील तामिळनाडूच्या जागेवर भाजपला एकही जागा मिळणार नाही, असा दावा रवी श्रीवास्तव यांनी केला.

दिल्लीच्या सर्व जागा इंडिया आघाडीकडे जातील. काँग्रेस तीन जागा जिंकेल आणि आम आदमी पार्टी (आप) चारही जागा जिंकेल. तामिळनाडूतील ३९ जागांपैकी १७ जागा द्रविड मुन्नेत्र कळघमकडे जातील, तर काँग्रेस ७ आणि इंडिया आघाडी १४ जागा जिंकेल. कर्नाटकमध्ये काँग्रेस भाजपपेक्षा पुढे असेल. २८ पैकी ६ जागा भाजपला आणि एक जागा जनता दल (सेक्युलर) च्या वाट्याला जाईल.

बिहारमध्ये ४० पैकी भाजप आणि जेडीयू मिळून १४ जागा जिंकू शकतात. यामध्ये ८ जागा भाजप तर ६ जागा जेडीयूकडे जाताना दिसतील. तर राष्ट्रीय जनता दलाला (आरजेडी) सर्वाधिक जागा मिळण्याची अपेक्षा आहे. त्यांच्या खात्यात १६ जागा जाऊ शकतात. त्याचवेळी काँग्रेसला ६ जागा मिळू शकतात आणि ४ जागा इतरांकडे जातील असे दिसते. बिहारमध्ये लोकसभेच्या एकूण ४० जागा आहेत. बिहारमधील ४० पैकी २२ जागा इंडिया आघाडीला जातील अस चित्र आहे.

पश्चिम बंगालमध्ये भाजप दुसऱ्या नंबरवर असेल. येथे ४२ जागांसह २८ जागा ममता बॅनर्जींच्या तृणमूल काँग्रेसला जागा मिळतात.तर  भाजपला १३ जागा मिळण्याची शक्यता आहे. काँग्रेसला केवळ १ जागा मिळण्याची शक्यता आहे, असे रवी श्रीवास्तव म्हणाले.

महाराष्ट्रात एनडीएला फक्त १२ जागा -

महाराष्ट्रात एनडीएला मोठा धक्का बसू शकतो. राज्यात भाजप, एकनाथ शिंदे यांची शिवसेना आणि अजित पवार यांच्या राष्ट्रवादी काँग्रेसला एकूण ४८ पैकी केवळ १२ जागा मिळण्याची अपेक्षा आहे. तर महाविकास आघाडीला ३६ जागा मिळू शकतात. उद्धव ठाकरेंच्या शिवसेनेला १६, शरद पवारांच्या राष्ट्रवादीला ६ आणि काँग्रेसला १४ जागा मिळू शकतात, असे जाणकारांचे म्हणणे आहे. त्याचवेळी भाजपला ८, एकनाथ शिंदे यांच्या सेनेला २ आणि अजित पवारांच्या राष्ट्रवादीला फक्त दोन जागा जिंकता येत असल्याचे दिसत आहे.

मध्यप्रदेश, राजस्थान, गुजरात आणि  उत्तर प्रदेशमध्ये भाजपची आघाडी?

मध्य प्रदेश, राजस्थान, गुजरात आणि उत्तर प्रदेशमध्ये भाजपच्या जागांची संख्या काँग्रेसपेक्षा जास्त असेल. भाजप मध्यप्रदेशातील २९ पैकी १७ जागांवर, राजस्थानमधील २५ पैकी १७ जागांवर, गुजरातमध्ये २६ पैकी १८ जागांवर आणि उत्तर प्रदेशातील ८० पैकी ५४ जागांवर विजय मिळवू शकतो. मात्र, गेल्या वेळच्या तुलनेत उत्तर प्रदेशमध्ये भाजपच्या जागा कमी होऊ शकतात असा अंदाज देखील रवी श्रीवास्तव यांनी व्यक्त केला आहे.  न्यूज एक्सने याबाबत वृत्त दिले आहे.